2021-ம் ஆண்டுக்குள் மம்தா அரசு கவிழும் - பா.ஜ.க.

கொல்கத்தா : வருகிற 2021-ம் ஆண்டுக்குள் மேற்கு வங்காளத்தில் மம்தா தலைமையிலான அரசு கவிழும் என பா.ஜ.க. தெரிவித்துள்ளது.

திரிணாமுல் குற்றச்சாட்டு

நாடாளுமன்ற மக்களவைக்கான தேர்தலில் மேற்கு வங்காளத்தில் திரிணாமுல் காங்கிரஸ் கட்சி 18 தொகுதிகளை கைப்பற்றியது.  ஆனால், கடந்த தேர்தலில் 2 இடங்களை பெற்றிருந்த பா.ஜ.க. இந்த முறை அதிக தொகுதிகளை கைப்பற்றி திரிணாமுல் காங்கிரசுக்கு அதிர்ச்சி அளித்தது. இதனை தொடர்ந்து, திரிணாமுல் காங்கிரஸ் கட்சியின் 2 எம்.எல்.ஏ.க்கள் மற்றும் 50-க்கும் மேற்பட்ட கவுன்சிலர்கள் பா.ஜ.க.வில் இணைந்தனர்.  தொடர்ந்து 6 எம்.எல்.ஏ.க்கள் இணைய உள்ளனர் என அக்கட்சி கூறியிருந்தது.  இதனால், குதிரை பேரத்தில் பா.ஜ.க. ஈடுபடுகிறது என்று திரிணாமுல் காங்கிரஸ் குற்றச்சாட்டு தெரிவித்தது.

தயாராகி வருகிறோம்...

இந்த நிலையில், பா.ஜ.க.வின் தேசிய பொது செயலாளர் கைலாஷ் விஜய்வர்கியா செய்தியாளர்களிடம் கூறும் போது, 2021-ம் ஆண்டு வரை மேற்கு வங்காள முதல்வராக மம்தா பானர்ஜி நீடிப்பார் என நான் நினைக்கவில்லை. இதுபற்றி இப்பொழுதே கூறுவது என்பது சரியாக இருக்காது.  2021 தேர்தலுக்காக நாங்கள் தயாராகி வருகிறோம். ஆனால் இந்த அரசு தன்னாலேயே கவிழும் என்று கூறினார்.