திருமலை கோயிலில் 12,000 ஜோடிகளுக்கு இலவச திருமணம்

திருமலை,மே.22 - திருமலை திருப்பதி கோயில் நிர்வாகம் சார்பில் 6 வது கட்ட இலவச திருமண விழா நடைபெற்றது.  ஆந்திர மாநிலத்தில் மொத்தம் 284 இடங்களில் நடந்த இந்த விழாவில் ஒரே நாளில் 12 ஆயிரம் ஜோடிகளுக்கு இலவசமாக திருமணம் செய்து வைக்கப்பட்டது. இதில் மணமக்களுக்கு தாலி, மெட்டி, பட்டுப்புடவை உள்ளிட்ட சீர் வரிசைகளோடு ஏழுமலையானின் பிரசாதமும் வழங்கப்பட்டது. மணமக்கள் சார்பில் 60 பேருக்கு இலவச விருந்தும் அளிக்கப்பட்டது. 

ஐதராபாத் லலித் கலா தோரணத்தில் நடைபெற்ற திருமண விழாவிற்கு ஆந்திர முதல்வர் கிரண்குமார் ரெட்டி தலைமை வகித்து ஜோடிகளுக்கு திருமணத்தை நடத்தி வைத்தார். சித்தூர் மாவட்டத்தில் மட்டும் 257 ஜோடிகள் கலந்து கொண்டு இலவச திருமணம் செய்து கொண்டனர். இலவச திருமணம் செய்து கொண்ட மணமக்களுக்கு கோயில் நிர்வாகம் சார்பில் திருமலையில் பெருமாளை வழிபட கல்யாண உற்சவ கட்டண சேவையும், தலா 6 பேருக்கு இலவச வழிபாட்டு அனுமதியும் அளிக்கப்படும் என தெரிவிக்கப்பட்டுள்ளது.