அதிகாரத்தில் இல்லாத போதே அராஜகம் செய்கிறார்கள்: தி.மு.க. ஒரு அடாவடி கட்சி - ரௌடித்தனம் செய்கிற கட்சி: பிரச்சாரத்தில் முதல்வர் எடப்பாடி கடும்தாக்கு

ஸ்ரீவைகுண்டம் : அதிகாரத்தில் இல்லாத போதே அராஜகம் செய்கிறார்கள் தி.மு.க. ஒரு அடாவடி கட்சி, ரௌடித்தனம் செய்கிற கட்சி என்று பிரச்சாரத்தில் முதல்வர் எடப்பாடி கடுமையாக தாக்கி பேசினார்.

ஸ்டாலின் சொல்வது அனைத்தும் பச்சைப்பொய். அம்மாவின் அரசு துறைதோறும் சாதனைகளை செய்து விருதுகளை வாங்கி குவித்திருக்கிறது என்று முதல்வர் எடப்பாடி பழனிசாமி தெரிவித்தார்.

தூத்துக்குடி மாவட்டம் ஸ்ரீவைகுண்டத்தில் நேற்று தேர்தல் பிரச்சாரத்தின் போது முதல்வர் கூறியதாவது:-

2006 முதல் 2011 வரை தி.மு.க. ஆட்சி இருந்தபோது எப்போது கரண்ட் வரும், எப்போது கரண்ட் போகும் என்றே தெரியாது, அடிக்கடி மின்தடை ஏற்பட்டது. இதனால் விவசாயிகள் பெரிதும் பாதிக்கப்பட்டார்கள், தொழிற்சாலையும் பாதிக்கப்பட்டது. புரட்சித்தலைவி அம்மா 2011 -ல் தமிழ்நாட்டில் தேர்தல் சுற்றுப் பயணம் மேற்கொண்டபோது நான் முதலமைச்சராக தேர்ந்தெடுக்கப்பட்டு, மூன்றே ஆண்டுகாலத்தில் தமிழக மக்களுக்கு தடையில்லா மின்சாரம் வழங்குவேன் என்று வாக்குறுதி கொடுத்தார்.

மூன்றே ஆண்டு காலத்தில் தமிழகத்தில் தடையில்லா மின்சாரம் கொடுத்து தான் கொடுத்த வாக்குறுதியை நிறைவேற்றிய ஒரே தலைவி புரட்சித்தலைவி அம்மா. அதே வழியில் வந்த அம்மாவின் அரசு திறமையான நிர்வாகத்தின் மூலமாக, உபரி மின்சாரத்தை உற்பத்தி செய்து, தமிழ்நாடு இப்போது மின்மிகை மாநிலமாக திகழ்ந்து, அதற்கும் நாங்கள் விருது வாங்கியிருக்கிறோம்.

தேசிய அளவில் உணவு தானிய உற்பத்தியை பெருக்கி தொடர்ந்து கிருஷி கர்மான் விருதை பெற்றுக் கொண்டிருக்கிறோம். போக்குவரத்துத் துறை, சமூகநலத் துறை, மருத்துவத் துறையில் உறுப்பு மாற்று அறுவை சிகிச்சையில் விருது என பல துறைகளில் விருதுகளை குவிக்கின்ற அரசாங்கம் அம்மாவின் அரசாங்கம். தமிழ்நாட்டில் எந்த ஆட்சியிலும் இவ்வளவு விருதுகளை பெற்ற சரித்திரம் கிடையாது.

அந்த சரித்திரத்தையும் என் தலைமையில் இருக்கின்ற அம்மாவின் அரசு பெற்றிருக்கின்றது. ஆகவே ஸ்டாலின் சொல்வது அனைத்தும் பச்சைப் பொய். உண்மை என்ற வார்த்தையே அவர் வாயிலிருந்து வருவது கிடையாது. நாட்டு மக்களுக்கு எண்ணற்ற திட்டங்களைக் கொண்டுவந்து அதன் மூலமாக நன்மை பயக்கின்ற ஒரே அரசாங்கம் அம்மாவின் அரசாங்கம்.

ஆகவே ஏழை, எளிய, ஒடுக்கப்பட்ட, நசுக்கப்பட்ட மக்களின் வாழ்வாதாரம் உயர வேண்டும் என்பதுதான் எங்கள் நோக்கம். 2011 -ல் அம்மா தேர்தல் அறிக்கையில், நான் முதலமைச்சராக ஆனவுடன் மிக்ஸி, கிரைண்டர், மின்விசிறி கொடுப்போம் என்று வாக்குறுதி அளித்தார், சொன்னபடி அதைக் கொடுத்தார்.

தி.மு.க.வும் 2006-ஆம் ஆண்டு வாக்குறுதி கொடுத்தார்கள், என்ன ஆயிற்று? நிலமற்ற விவசாயிகளுக்கு 2 ஏக்கர் நிலம் கொடுப்பதாக சொன்னார்கள், இந்த ஸ்ரீவைகுண்டம் தொகுதியில் எவ்வளவு பேர் நிலம் வாங்கியிருக்கிறீர்கள்?  2 ஏக்கர் நிலம் கொடுக்க முடியுமா? எங்கு இருக்கிறது? எவ்வளவு பச்சைப் பொய், மக்களை எப்படியெல்லாம் ஏமாற்றுகிறார்கள் என்று பாருங்கள். இன்றைக்கு அடக்கம் செய்யவே நிலம் இல்லாதபோது எங்கு 2 ஏக்கர் நிலம் கொடுப்பார்கள்? நிலம் கொடுக்காவிட்டால் போகிறது, மக்களிடத்திலிருந்து நிலத்தை தி.மு.க.-வினர் பிடுங்காமல் இருந்தாலே போதும். அப்படியிருந்தாலே மக்கள் நிம்மதியாக வாழ்வார்கள்.

தமிழகத்தில் சட்டம் ஒழுங்கு மிகச் சிறப்பாக இருந்து கொண்டிருக்கிறது. தி.மு.க. ஆட்சியில் இருக்கும்போது, சட்டம் ஒழுங்கு மிக மோசமாக இருந்தது. அப்பாவி மக்களிடம் நிலம் இருந்தால் தி.மு.க.-காரன் அடித்து பிடுங்கி விடுவான். இதற்காக அம்மா நிலம் அபகரிப்பு ஒழிப்பு என்ற பிரிவை தொடங்கி, அப்பாவி மக்களிடமிருந்து தி.மு.க.-காரர்கள் அபகரித்த நிலம் குறித்து விசாரித்து, அந்த உரிமையாளர்களுக்கு மீட்டுக் கொடுத்த அரசு அம்மாவின் அரசாங்கம்.

இன்றைக்குகூட ஆட்சி அதிகாரத்தில் அவர்கள் இல்லை, ஆனால் தி.மு.க. ஒரு அராஜக கட்சி, அடாவடி கட்சி, ரௌடித்தனம் செய்கிற கட்சி. ஆட்சி அதிகாரம் இல்லாதபோதே, ஓட்டலில் சென்று நன்றாக சாப்பிட்டுவிட்டு பில்லை கட்டாமல் மூக்கு மேல் குத்துகிறான். அடுத்த நாள் ஸ்டாலின் கட்ட பஞ்சாயத்து செய்ய செல்கிறார். பெரம்பலூரில் தி.மு.க. முன்னாள் மாவட்ட கவுன்சிலர், பெண்கள் அழகு நிலையத்தில் புகுந்து ஒரு பெண்ணை காலால் மிதிக்கிறார். செல்போன் கடைக்குச் சென்று செல்போன் வாங்கிவிட்டு, செல்போனுக்கு பணம் கேட்டால் உதைக்கிறார்கள்.

தேங்காய் கடைக்குச் சென்று தேங்காய் வாங்கிவிட்டு, அந்தப் பெண்மணி தேங்காய்க்குண்டான பணத்தைக் கேட்டால் அடிக்கிறார்கள். ஆட்சி அதிகாரத்தில் இல்லாதபோதே இப்படி அட்டூழியம் செய்கிறார்களென்றால், ஆட்சி அதிகாரத்திற்கு வந்தால் மக்களை நிம்மதியாக வாழ விடுவார்களா இவர்கள்? எனவே அது மோசமான கட்சி, அராஜக கட்சி, அவர்கள் ஆட்சிக்கு வரமுடியாது, வந்துவிட்டால் நாட்டு மக்கள் நிம்மதியாக வாழ முடியாது என்பதை மட்டும் நீங்கள் எண்ணிப் பார்க்கவேண்டும்.

புரட்சித்தலைவர் எம்.ஜி.ஆர், புரட்சித்தலைவி அம்மா வழியிலே நடைபெறுகின்ற அரசு எங்களுடைய அரசு. ஒரு விவசாயி தமிழகத்தின் முதலமைச்சராக இருந்து ஆட்சி செய்து கொண்டிருக்கின்றோம். மக்களோடு மக்களாக இருந்து மக்களின் எண்ணத்தை புரிந்து, மக்களின் குறைகளைத் தெரிந்து, அவர்களுக்கு ஏற்படுகின்ற கஷ்ட, நஷ்டங்களைப் புரிந்து எங்களுடைய அரசு திட்டம் தீட்டி, நாட்டு மக்களுக்கு நன்மை செய்து கொண்டிருக்கிறது. ஆகவே மீண்டும் அம்மாவினுடைய ஆட்சி தொடர, கழக வேட்பாளர் வெற்றிபெற, உங்கள் பொன்னான வாக்கினை இரட்டை இலை சின்னத்திற்கு வாக்களித்து வெற்றி பெறச் செய்ய வேண்டுமென்று அன்போடு கேட்டுக் கொள்கிறேன். என்று பேசினார்.

ஸ்ரீவைகுண்டத்தில் பிரச்சாரத்தை முடித்து கொண்டு திருச்செந்தூரில் மகளிர் சுய உதவிக் குழுவினருடன் முதல்வர் கலந்துரையாடினார்.

தொடர்ந்து பிற்பகலில் தூத்துக்குடியில் உள்ள தனியார் விடுதியில் ஓட்டப்பிடாரம் சட்டமன்ற தொகுதி அ.தி.மு.க. இளைஞர்-இளம்பெண்கள் பாசறை மற்றும் தகவல் தொழில் நுட்ப பிரிவு நிர்வாகிகள் கூட்டத்தில் பங்கேற்று பேசினார்.

பின்னர் மதியம் அங்கு கட்சியின் முக்கிய நிர்வாகிகளை சந்தித்து ஆலோசனை மேற்கொண்டார்.