வரும் 28-ம் தேதி ஜி.எஸ்.டி. கவுன்சிலின் 43-வது கூட்டம் : நிர்மலா சீதாராமன் தலைமையில் நடக்கிறது

புதுடெல்லி : மத்திய நிதியமைச்சர் நிர்மலா சீதாராமன் தலைமையில் ஜி.எஸ்.டி. கவுன்சிலின் 43-வது கூட்டம் காணொலி வாயிலாக வரும் 28-ம் தேதி நடைபெறுகிறது. இதுபற்றி நிதியமைச்சரின் அதிகாரப்பூர்வ டுவிட்டர் பக்கத்தில் குறிப்பிடப்பட்டுள்ளது. 

மத்திய அமைச்சர் நிர்மலா சீதாராமன் தலைமையிலான ஜி.எஸ்.டி கவுன்சிலின் 43-வது கூட்டம் வரும் 28-ம் தேதி காலை 11 மணிக்கு காணொலி வாயிலாக டெல்லியில் நடைபெறுகிறது. இந்தக் கூட்டத்தில் மத்திய நிதித் துறை இணை அமைச்சர் அனுராக் தாக்குர், மாநில மற்றும் யூனியன் பிரதேசங்களின் நிதியமைச்சர்கள், மத்திய, மாநில அரசுகளின் மூத்த அதிகாரிகள் உள்ளிட்டோர் பங்கேற்கின்றனர். 

ஜி.எஸ்.டி. கவுன்சிலின் 42-வது கூட்டம் கடந்தாண்டு அக்டோபர் மாதம் நடைபெற்றது. 2021-ல் நடைபெறும் முதல் ஜி.எஸ்.டி கவுன்சில் கூட்டம் என்பதால் நிலுவையில் உள்ள பல்வேறு விவகாரங்கள் இந்தக் கூட்டத்தில் எழுப்பப்படலாம் என எதிர்பார்க்கப்படுகிறது. கொரோனா தடுப்பூசி உள்பட நோய்த் தொற்று தொடர்பான சாதனங்கள் மீதான ஜி.எஸ்.டி வரி விதிப்பு குறித்து மாநிலங்கள் எழுப்பும் என எதிர்பார்க்கப்படுகிறது.