அரசு டாக்டர் மீது கத்திக்குத்து தாக்குதல்: எடப்பாடி கண்டனம்

சென்னை : சென்னை கிண்டி அரசு மருத்துவமனை டாக்டர் மீதான கத்துக்குத்து தாக்குதல் சம்பவத்திற்கு அ.தி.மு.க. பொது செயலாளர் எடப்பாடி பழனிசாமி கடும் கண்டனம் தெரிவித்துள்ளார். 

இது குறித்து அ.தி.மு.க. பொது செயலாளர் எடப்பாடி பழனிசாமி தனது டுவிட்டர் பக்கத்தில் வெளியிட்டுள்ள அறிக்கையில் கூறியிருப்பதாவது:-

சென்னை கிண்டிஅரசு மருத்துவமனையில், புற்றுநோய் டாக்டர் பாலாஜியை மர்மநபர்கள் பட்டப்பகலில் கத்தியால் குத்தியுள்ள சம்பவம் அதிர்ச்சியளிக்கிறது. ஏற்கனவே கடந்த கடந்த 5-ம் தேதி திருச்சி இ.எஸ்.ஐ. மருத்துவமனையில் அரசு டாக்டர் முத்து கார்த்திகேயனை 6 பேர் கொண்ட கும்பல் தாக்கியதாக செய்திகள் வந்தன.

அரசு மருத்துவமனையில் அரசு டாக்டருக்கு கூட பாதுகாப்பு இல்லை என்பது, இந்த ஆட்சியில் சட்டம் ஒழுங்கு எவ்வாறு இருக்கிறது என்பதை பட்டவர்த்தனமாக காட்டுகிறது. இதற்கு எனது கடும் கண்டனம்.

கத்திக்குத்தால் பாதிக்கப்பட்டுள்ள டாக்டர் பாலாஜிக்கு உரிய மருத்துவ சிகிச்சை அளிக்கவும், அவரைத் தாக்கியவர்கள் மீது கடுமையான சட்ட நடவடிக்கை எடுக்கவும்,  முதல்வர்  என்ற முறையில் தனது தலையாயப் பணியான சட்டம் ஒழுங்கைக் காப்பதற்கான நடவடிக்கைகளை மேற்கொள்ளுமாறு வலியுறுத்துகிறேன். இவ்வாறு அவர் அந்த அறிக்கையில் தெரிவித்துள்ளார்.