ராகுல் காந்தியின் குடியுரிமை வழக்கு: மத்திய அரசுக்கு டெல்லி உயர் நீதிமன்றம் கேள்வி

புதுடெல்லி : ராகுல் காந்தியின் குடியுரிமை வழக்கு தொடர்பாக சுப்பிரமணியன் சுவாமி தொடர்ந்த வழக்கில் மத்திய அரசின் நிலைப்பாட்டை தெரிவிக்கும்படி ஐகோர்ட் உத்தரவிட்டுள்ளது.

பாராளுமன்ற மக்களவை எதிர்க்கட்சி தலைவர் ராகுல் காந்தியின் குடியுரிமையை ரத்து செய்வது தொடர்பாக மத்திய உள்துறை அமைச்சகம் நடவடிக்கை எடுக்க உத்தரவிட கோரி சுப்பிரமணியன் சுவாமி டெல்லி ஐகோர்ட்டில் வழக்கு தொடர்ந்துள்ளார். அதில், மக்களவை எதிர்க்கட்சி தலைவர் ராகுல் காந்தி பிரிட்டன் பாஸ்போர்ட் விசாரணையின்போது தான் ஒரு பிரிட்டன் குடிமகன் என்பதை பிரிட்டிஷ் அரசிடம் வெளிப்படுத்தியது குறித்து விளக்கம் அளிக்கும்படி கடந்த 2019 ஆகஸ்ட் 6-ம் தேதி மத்திய உள்துறை அமைச்சகத்துக்கு கடிதம் எழுதியதாக சுப்பிரமணியன் சுவாமி தெரிவித்திருந்தார். இந்த விவகாரத்தில் மத்திய உள்துறை அமைச்சகம் முடிவெடுக்க நீதிமன்றம் உத்தரவிட வேண்டும் எனவும் மனுவில் கோரியிருந்தார்.

'ராகுல் காந்தி இந்திய குடிமகனாக இருந்துகொண்டு இந்திய அரசியலமைப்பின் 9-வது பிரிவை மீறியதால் அவரது இந்திய குடியுரிமை ரத்தாகிவிடும, அவர் இந்திய குடிமகனாக கருதப்படமாட்டார். எனது புகாரின் நிலை குறித்து அறிவதற்காக அமைச்சகத்திடம் பல முறை கடிதம் கொடுத்தும் எந்த நடவடிக்கையும் எடுக்கப்படவில்லை. நடவடிக்கை குறித்து எனக்கு எந்த தகவலும் தெரிவிக்கப்படவில்லை' என்றும் சுப்பிரமணியன் சுவாமி தெரிவித்தார். இந்நிலையில், சுப்பிரமணியன் சுவாமி தொடர்ந்த வழக்கில் மத்திய அரசின் நிலைப்பாடு என்ன என்பதை தெரிவிக்கும்படி ஐகோர்ட் நேற்று உத்தரவிட்டுள்ளது.