ஆதி திராவிடர் கல்லூரி மாணவர் விடுதிக்கு புதிய கட்டிடங்கள் கட்ட ரூ. 10.75 கோடி: தமிழக அரசு அரசாணை வெளியீடு

ஆதி திராவிடர் கல்லூரி மாணவர்  விடுதிகளுக்கு அனைத்து வசதிகளுடன் கூடிய புதிய கட்டிடங்கள் கட்ட ரூ.10.75 கோடி நிதி ஒதுக்கீடு செய்து தமிழக அரசு அரசாணை வெளியிட்டுள்ளது. 

இது குறித்து அரசு முதன்மை செயலாளர் மணிவாசன் விடுத்துள்ள செய்திக்குறிப்பில், 

கடந்த 08.09.2021 அன்று தமிழக சட்டசபையில் 2021-22 ஆம் ஆண்டிற்கான திருத்திய வரவு செலவு கூட்டத்தொடரில் இத்துறையின் மானியக் கோரிக்கையின் மீதான விவாதத்தின் போது, ஆதி திராவிடர் நல்ததுறை அமைச்சர் கீழ்க்கண்ட அறிவிப்பை வெளியிட்டிருந்தார்.

அதன்படி ஆதி திராவிட மாணாக்கரின் உயர் கல்விக்கான வாய்ப்புகளை பெருக்கிடும் வகையிலும், அவர்கள் பாதுகாப்பாக தங்கி கல்வி பயிலும் வகையிலும், வேலூர் ஆதிதிராவிடர் முதுகலை கல்லூரி மாணவியர் விடுதி, விழுப்புரம் மாவட்டம், திண்டிவனம் மற்றும் சேலம் மாவட்டம், மரவனேரி ஆதிதிராவிடர் கல்லூரி மாணவர் விடுதிகளுக்கு அனைத்து வசதிகளுடன் கூடிய புதிய கட்டிடங்கள் ரூ.10.75 கோடி மதிப்பீட்டில் கட்டப்படும் என்று தெரிவித்திருந்தார். 

இந்த அறிவிப்பினை செயல்படுத்தும் விதமாக, ஆதிதிராவிடர் நலத்துறையின் கீழ் இயங்கும் பள்ளிகளில் ஆதிதிராவிட மாணாக்கரின் உயர் கல்விக்கான வாய்ப்புகளை பெருக்கிடும் வகையிலும், அவர்கள் பாதுகாப்பாக தங்கி கல்வி பயிலும் வகையிலும், வேலூர் ஆதிதிராவிடர் முதுகலை கல்லூரி மாணவியர் விடுதி, விழுப்புரம் மாவட்டம், திண்டிவனம் மற்றும் சேலம் மாவட்டம், மரவனேரி ஆதிதிராவிடர் கல்லூரி மாணவர் விடுதிகளுக்கு அனைத்து வசதிகளுடன் கூடிய புதிய கட்டிடங்கள் ரூ.10,75,00,000/- (ரூபாய் பத்து கோடியே எழுபத்தைந்து லட்சம் மட்டும்) மதிப்பீட்டில் பொதுப்பணித்துறையின் மூலம் பணிகளை  மேற்கொள்ள, நிர்வாக அனுமதி அளித்தும் நிதி ஒதுக்கீடு செய்தும்  அரசாணை வெளியிடப்பட்டுள்ளது. இவ்வாறு அதில் தெரிவி்க்கப்பட்டுள்ளது.