நாடு முழுவதும் 73 நகரங்களில் நடந்த குடிமை பணிகளுக்கான முதல்நிலை தேர்வு

சென்னை : யு.பி.எஸ்.சி குடிமைப் பணிகளுக்கான முதல்நிலை தேர்வு நேற்று நாடு முழுவதும் 73 நகரங்களில் நடைபெற்றது.  

நாடு முழுவதும் நேற்று  ஐ.ஏ.எஸ்., ஐ.பி.எஸ்., ஐ.ஆர்.எஸ். உள்ளிட்ட 24 சிவில் சர்வீஸ் பணிகளுக்கான முதல்நிலை தேர்வு நடைபெற்றது.  நாடு முழுவதும் 7 லட்சம் பேர் இந்தத் தேர்வினை எழுதினர். 

ஒன்றிய அரசு பணியாளர் தேர்வாணையம் எனப்படும் யு.பி.எஸ்.சி. ஆண்டு தோறும் ஐ.ஏ.எஸ்., ஐ.பி.எஸ், மற்றும் ஐ.ஆர்.எஸ். உள்ளிட்ட 24 வகையான உயர்பதவிகளுக்கான தேர்வுகளை நடத்தி வருகிறது. இது முதல் நிலை, முதன்மை தேர்வு மற்றும் நேர்க்காணல் என 3 கட்டங்களாக தேர்வு நடத்தப்படுகிறது. 

அந்தவகையில் நடப்பு ஆண்டுக்கான குடிமைப் பணிகளில் அடங்கிய 1,105 பதவிகளை நிரப்புவதற்கான அறிவிப்பு கடந்த பிப்ரவரி 1-ம் தேதி வெளியானது. தொடர்ந்து பிப்ரவரி 21-ம் தேதி வரை விண்ணப்பிக்க கால அவகாசம் வழங்கப்பட்ட நிலையில், இந்தியா முழுவதிலிருந்தும் சுமார் 7 லட்சம் பட்டதாரிகள் இந்த தேர்வுக்கு விண்ணப்பித்துள்ளனர்.

இதில், தமிழகத்தில் இருந்து மட்டும் சுமார் 50 ஆயிரம் பேர் வரை தேர்வுக்கு விண்ணப்பித்து இருந்தனர்.  இவர்களுக்கான முதல் நிலை தேர்வு நேற்று நடைபெறும் என்று யு.பி.எஸ்.சி. அறிவித்திருந்தது. 

அதன்படி குடிமைப் பணிக்கான முதல்நிலை தேர்வு இந்தியா முழுவதும் நேற்று 73 நகரங்களில் நடந்தது.  தமிழகத்தில் சென்னை, கோவை, மதுரை, திருச்சி, வேலூர் ஆகிய 5 நகரங்களில் தேர்வு நடைபெற்றது. 

காலை 9.30 மணி முதல் காலை 11.30 மணி வரை பொது அறிவு தேர்வும், மதியம் 2.30 மணி முதல் மாலை 4.30 மணி வரை திறனறிவு தேர்வும் நடைபெற்றது.  அனைத்து தேர்வு மையங்களிலும் போலீசார் தீவிர பாதுகாப்பு பணியில் ஈடுபட்டு இருந்தனர். தேர்வர்கள் செல்போன் உள்ளிட்ட மின்சாதன பொருட்களை தேர்வு மையத்திற்கு எடுத்துச் செல்லக் கூடாது என்பது போன்ற கட்டுப்பாடுகள் விதிக்கப்பட்டிருந்தது.