கர்நாடக அணைகளில் இருந்து காவிரியில் நீர் திறப்பு அதிகரிப்பு

சேலம் : கர்நாடக அணைகளில் இருந்து காவிரி ஆற்றில் தண்ணீர் திறப்பு நேற்று காலை வினாடிக்கு 4,674 கன அடியாக அதிகரிக்கப்பட்டுள்ளது. 

கர்நாடகாவில் உள்ள கிருஷ்ணராஜசாகர் அணைக்கு நீர்வரத்து நேற்று காலை 6 ஆயிரத்து 16 கன அடியாக இருந்தது. அணையில் இருந்து 2 ஆயிரத்து 674 கன அடி தண்ணீர் வெளியேற்றப்பட்டு வருகிறது. அணையின் நீர்மட்டம் 97.08 அடியாக உள்ளது. கபினி அணைக்கு நேற்றுகாலை நீர்வரத்து 3 ஆயிரத்து 166 கன அடியாக இருந்தது. அணையில் இருந்து 2000 கன அடி தண்ணீர் காவிரியில் திறந்து விடப்பட்டுள்ளது. 

நேற்று முன்தினம் இந்த அணையில் இருந்து 1,663 கன அடி நீர் திறக்கப்பட்டது. நேற்று சற்று அதிகரிக்கப்பட்டுள்ளது. அணையின் நீர்மட்டம் 75.97 அடியாக உள்ளது. 2 அணைகளில் இருந்தும் நேற்று முன்தினம் தண்ணீர் திறப்பு 3 ஆயிரத்து 834 கன அடியாக இருந்த நிலையில் நேற்று காலை 4 ஆயிரத்து 674 கன அடி தண்ணீரை கர்நாடகம்  திறந்து விட்டுள்ளது. இந்த நீர்வரத்தை கர்நாடக - தமிழக எல்லையில் உள்ள பிலிகுண்டு பகுதியில் மத்திய நீர்வளத்துறை அதிகாரிகள் கண்காணித்து வருகின்றனர்.