தே.ஜ. கூட்டணியில் சேர எடியூரப்பா முடிவு

பெங்களூர், அக். 21 - கர்நாடகாவில் முதல் மந்திரியாக இருந்த எடியூரப்பா ஊழல் குற்றச்சாட்டில் சிக்கியதால் பதவி இழந்தார். மீண்டும் அவர் முதல்வராக பா.ஜ.க. அனுமதிக்கவில்லை. இதனால் அவர் பா.ஜ.க.வில் இருந்து விலகி கர்நாடக ஜனதா கட்சி என்ற புதிய கட்சியை தொடங்கினார். கடந்த ஏப்ரலில் நடந்த சட்டசபை தேர்தலில் அவரது கட்சி தோல்வியை தழுவியது. மேலும் பல தொகுதிகளில் பா.ஜ.க. வேட்பாளர்கள் தோல்வியடைய எடியூரப்பா கட்சி காரணமாக இருந்தது. இதனால் பா.ஜ.க.வில் மீண்டும் அடைக்கலம் புகலாமா என்று எடியூரப்பா ஆலோசித்தார். ஆனால் பா.ஜ.க. தலைவர்கள் அதில் ஆர்வம் காட்டவில்லை. இதனிடையே நேற்று எடியூரப்பா ஆலோசனை கூட்டம் நடத்தினார். அதில் பா.ஜ.க தலைமையிலான தேசிய ஜனநாயக கூட்டணியில் இடம் பெறலாம் என்று தீர்மானம் கொண்டு வரப்பட்டது. இது குறித்து பா.ஜ.க மூத்த தலைவர் அத்வானிக்கு கடிதம் எழுதி பா.ஜ.க. கூட்டணியில் சேர கர்நாடக ஜனதா கட்சி தயாராக உள்ளது என்று விருப்பம் தெரிவித்துள்ளார். பா.ஜ.க. தேசிய தலைவர் ராஜ்நாத்சிங், எதிர்க்கட்சி தலைவர் சுஷ்மா ஸ்வராஜ் ஆகியோருக்கும் நகல் அனுப்பி உள்ளார். கர்நாடகாவில் மொத்தம் 29 தொகுதிகள் உள்ளன. இவற்றில் 10 தொகுதிகளில் பா.ஜ.க. ஆதரவுடன் போட்டியிட எடியூரப்பா விருப்பம் தெரிவித்துள்ளார். எனவே கர்நாடகாவில் பா.ஜ.க. எடியூரப்பா கட்சிகளிடையே கூட்டணி ஏற்படலாம் என்று எதிர்பார்க்கப்படுகிறது.