பார்லி. தேர்தலில் பா.ஜ.க.வை வீழ்த்துவதே நோக்கம்: கார்கே

ஐதராபாத் : 2024 பாராளுமன்ற தேர்தலில் பா.ஜ.க.வை வீழ்த்துவதே காங்கிரசின் நோக்கமாக இருக்க வேண்டும் என்று காங்கிரஸ் தலைவர் கார்கே தெரிவித்தார். 

காங்கிரஸ் செயற்குழு கூட்டம் தெலுங்கானா மாநிலம் ஐதராபாத்தில் நேற்று நடைபெற்றது. இதில், காங்கிரஸ் தலைவர் மல்லிகார்ஜுன கார்கே பங்கேற்றார். மேலும், காங்கிரஸ் மூத்த தலைவர்கள் பலர் பங்கேற்றனர்.  கூட்டத்தில் மல்லிகார்ஜுன கார்கே பேசியதாவது, 

2024 பாராளுமன்ற தேர்தலில் பா.ஜ.க.வை வீழ்த்துவதே காங்கிரசின் நோக்கமாக இருக்க வேண்டும். நாட்டில் மாற்று அரசை அமைக்க அயராது உழைக்க வேண்டும். புதிய பிரச்சினைகளை கொண்டு வந்து முக்கியமான அடிப்படை பிரச்சினைகளில் இருந்து மக்களை மோடி அரசு திசை திருப்புகிறது. 

 சமீபத்தில் மும்பையில் இண்டியா கூட்டணி கட்சி கூட்டம் நடந்த போது, மோடி அரசு ஒரே நாடு ஒரே தேர்தல் குறித்து ஆராய குழுவை அமைத்தது. அனைத்து மரபுகளுக்கும் முரணாக இந்த குழுவில் முன்னாள் ஜனாதிபதி சேர்க்கப்பட்டுள்ளார். 

நமது தனிப்பட்ட நலன்களை ஒதுக்கி வைத்து விட்டு ஓய்வின்றி நாம் உழைக்க வேண்டும். மேலும், நமது தனிப்பட்ட வேறுபாடுகளை ஒதுக்கி வைத்து விட்டு கட்சியின் வெற்றியை முன்னிலைப்படுத்த வேண்டும். ஜனநாயகத்தை காப்பாற்ற இந்த சர்வாதிகார அரசை துடைத்தெரிய நாம் ஒன்றிணைந்து செயல்பட வேண்டும். இவ்வாறு அவர் பேசினார்.