ஆந்திரா மற்றும் தெலுங்கானாவில் 60-க்கும் மேற்பட்ட இடங்களில் என்.ஐ.ஏ. அதிகாரிகள் சோதனை

புதுடெல்லி :  இடதுசாரி தீவிரவாதம் தொடர்பாக ஆந்திரா மற்றும் தெலுங்கானா மாநிலங்களில் 60-க்கும் மேற்பட்ட இடங்களில் தேசிய புலனாய்வு முகமையினர் நேற்று  சோதனை நடத்தினர்.

இரண்டு மாநிலங்களிலும் இடதுசாரி தீவிரவாதம் அல்லது நக்சல்களுடன் தொடர்புடையவர்கள் என சந்தேகிக்கப்படும் நபர்களுக்குச் சொந்தமான இடங்கள் மற்றும் மறைவிடங்களில் இச்சோதனை நடந்து வருகிறது. தகவலின் அடிப்படையில் என்.ஐ.ஏ. தனிப்படையினர் மாநிலப் போலீசாருடன் இணைந்து நேற்று காலை முதல் சோதனையில் ஈடுபட்டனர். 

இரண்டு மாநிலங்களிலும் சேர்த்து 60-க்கும் மேற்பட்ட இடங்களில் இந்த சோதனை நடைபெற்றது. தெலுங்கானாவின் ஐதராபாத், ஆந்திராவின் குண்டூர், நெல்லூர் மற்றும் திருப்பதி மாவட்டங்களில் சோதனைகள் நடைபெற்றன.  நக்சல்களுடன் தொடர்பிருப்பதாக சந்தேகிக்கப்படும் சிவில் உரிமை அமைப்புகளின் தலைவர்களின் வீடுகளிலும் சோதனை நடத்தப்பட்டது. 

கடந்த ஜூன் மாதம், கம்யூனிஸ்ட் கட்சி (மாவோயிஸ்ட்) அமைப்பைச் சேர்ந்தவர்களிடம் இருந்து வெடிகுண்டுகள், டிரோன்கள் மற்றும் லேத் இந்திரங்கள் கைப்பற்றப்பட்டன. இதனையடுது்து, இது தொடர்பாக 12 பேர் மீது என்.ஐ.ஏ. வழக்குப் பதிவு செய்தது.

இதன் தொடர்ச்சியாக கடந்த ஆகஸ்ட் மாதம் கம்யூனிஸ்ட் கட்சி (மாவோயிஸ்ட்) தடை செய்யப்பட்டது. இந்த வழக்கு தொடர்பாக தெலுங்கானா மற்றும் சத்தீஸ்கர் மாநிலங்களில் என்.ஐ.ஏ. செப்டம்பர் 9-ம் தேதி சோதனை நடத்தியது குறிப்பிடத்தக்கது.