வக்பு திருத்த சட்ட மசோதா மீதான நாடாளுமன்ற கூட்டுக்குழு கூட்டம் 18-ம் தேதி நடக்கிறது

புதுடெல்லி : வக்பு திருத்தச் சட்ட மசோதா  குறித்த நாடாளுமன்ற கூட்டுக்குழு கூட்டம் செப்.18, 19 மற்றும் 20 ஆகிய தேதிகளில் நடக்க இருக்கிறது என்று நாடாளுமன்ற செயலகம் தெரிவித்துள்ளது.

இது குறித்த அறிக்கையில், வரும் 18-ம் தேதி, சிறுபான்மையினர் நலத்துறையைச் சேர்ந்த பிரதிநிதிகள் வக்பு திருத்தச் சட்ட மசோதா  நாடாளுமன்ற குழு முன்பாக ஆஜராகும் சாட்சிகளின் வாக்குமூலங்களைப் பதிவு செய்ய இருக்கின்றனர். வரும் 19-ம் தேதி நாடாளுமன்ற நிலைக்குழு, நிபுணர்கள் மற்றும் இந்த விவகாரம் தொடர்பானவர்களிடம் இருந்து கருத்துகள் மற்றும் ஆலோசனைகளை பெற இருக்கிறது.

அதை தொடர்ந்து வரும் 20-ம் தேதி நாடாளுமன்ற நிலைக்குழு அஜ்மீரில் உள்ள அகில இந்திய சஜ்ஜதனசின் கவுன்சில், டெல்லியில் உள்ள முஸ்லிம் ராஷ்ட்ரீய மஞ்ச் மற்றும் டெல்லியில் உள்ள பாரத் பர்ஸ்ட் ஆகிவைகளிடமிருந்து ஆலோசனைகளைப் பெற இருக்கிறது என்று தெரிவிக்கப்பட்டுள்ளது.

வக்பு திருத்தச் சட்ட மசோதா குறித்த நாடாளுமன்ற கூட்டுக்குழுவின் நான்காவது கூட்டம் கடந்த 6-ம் தேதி நடந்தது. அந்தக் கூட்டத்தின் போது, இந்திய தொல்லியல் துறையினைச் சேர்ந்த மூத்த அதிகாரிகள் நாடாளுமன்ற கூட்டுக்குழு முன்பு ஒரு அறிக்கையை சமர்ப்பித்தனர். 

ஸாகத் பவுண்டேஷன் ஆப் இந்தியா மற்றும் தெலுங்கானா வக்பு போர்டு உள்ளிட்ட சம்மந்தப்பட்டவர்கள் வக்பு திருத்தச் சட்டம்  தொடர்பான தங்களின் பார்வைகள், ஆலோசனைகள் தெரிவித்தது குறிப்பிடத்தக்கது.