நாஸாவின் விண்வெளி பயணம் சுனிதா வில்லியம்ஸ் தேர்வு

வாஷிங்டன் : அமெரிக்க விண்வெளி ஆய்வு அமைப்பான நாஸா, முதல் முறையாக அடுத்த ஆண்டு தொடங்கவிருக்கும் வர்த்தக ரீதியிலான விண்வெளிப் பயணத்துக்குத் தேர்ந்தெடுத்துள்ள 9 பேரில் இந்திய வம்சாவளியைச் சேர்ந்த சுனிதா வில்லியம்சும் இடம் பெற்றுள்ளார்.

இதுகுறித்து நாஸா அதிகாரிகள் கூறியதாவது:-

எதிர்காலத்தில் நாஸாவின் வர்த்தக ரீதியிலான விண்வெளி ஆய்வுக் கலங்கள் அனைத்தும், ஸ்பேஸ்-எக்ஸ் மற்றும் போயிங் ஸ்பேஸ் ஆகிய தனியார் நிறுவனங்களுடன் இணைந்து விண்ணில் ஏவப்படும். அடுத்த ஆண்டின் தொடக்கத்தில், போயிங் சி.எஸ்.டி-100 ஸ்டார்லைனர் மற்றும் ஸ்பேஸ்-எக்ஸ் டிராகன் கேப்ஸ்யூல் மூலம் 8 நாஸா விஞ்ஞானிகளும், நாஸாவில் பணியாற்றி விட்டு தற்போது தனியார் நிறுவனத்தில் பணியாற்றும் ஒருவரும் விண்வெளிப் பயணம் மேற்கொள்கின்றனர். இந்த 9 பேரில் சுனிதா வில்லியம்சும் ஒருவர்.

அடுத்த ஆண்டுக்குப் பிறகு அமெரிக்க மண்ணிலிருந்தே விஞ்ஞானிகளை விண்வெளிக்கு அனுப்ப முடியும்.

விண்வெளி ஆய்வுத் துறையில் அமெரிக்காவின் முன்னிலையைத் தக்க வைக்க இந்தத் திட்டம் பெரிதும் உதவும் என்று நாஸா அதிகாரிகள் தெரிவித்தனர்.