குண்டான் சட்டி - விமர்சனம்

சிறுமி பி கே அகஸ்தி, இயக்கியுள்ள படம் குண்டான் சட்டி, அனிமேஷனாக உருவாகியுள்ள இப்படத்துக்கு வசனம் மற்றும் பாடல்களை அரங்கன் சின்னத்தம்பி எழுத, இயக்குனர் அகஸ்தியின் தந்தை கார்த்திகேயன் இப்படத்தை தயாரித்துள்ளார். கிராமமொன்றில் நண்பர்களான குப்பனுக்கும் சுப்பனுக்கும் ஆளுக்கொரு ஆண் குழந்தை பிறக்க, அதில் ஒரு குழந்தைக்கு வித்தியாசமாக தலையில் ‘சட்டி’ அமைந்திருக்கிறது. ஒரு குழந்தைக்கு குண்டேஸ்வரன் என்றும் இன்னொரு குழந்தைக்கு சட்டீஸ்வரன் என்றும் பெயர் வைக்கப்பட, அவர்கள் ‘குண்டான்’, ‘சட்டி’ என்று அழைக்கப்படுகிறார்கள். சட்டீஸ்வரனின் தலையிலிருக்கும் சட்டியில் எதை வேண்டுமானாலும் போடலாம்; தலையை சாய்த்தால் உள்ளே நிரம்பியிருப்பவை வெளியில் கொட்டும். அப்படியொரு வினோத சக்தி சட்டிஸ்வரனுக்கு உண்டு. இருவரின் தோற்றமும் அனிமேஷனில் வடிவமைக்கப்பட்டிருக்கும் விதம் அழகு. சிரிக்கவும் சிந்திக்கவும் வைத்த படத்தை இயக்கிய 12 வயது சிறுமி பி கே அகஸ்தி நிச்சயம் பாராட்டுக்குரியவர்.