மார்ச்-1ல் இருந்து ஐ.பி.எல். 2020 சீசன் பயிற்சியை தொடங்குகிறார் டோனி

மும்பை : சென்னை சூப்பர் கிங்ஸ் அணி பயிற்சியை தொடங்கிய நிலையில் மார்ச் 1-ம் தேதியில் இருந்து டோனியும் இணைவார் என எதிர்பார்க்கப்படுகிறது.

ஐ.பி.எல். 2020 சீசன் அடுத்த மாதம் 29-ம் தேதி தொடங்குகிறது. மும்பை வான்கடே மைதானத்தில் நடக்கும் முதல் ஆட்டத்தில் நடப்பு சாம்பியன் மும்பை இந்தியன்ஸ் - சென்னை சூப்பர் கிங்ஸ் அணிகள் பலப்பரீட்சை நடத்துகின்றன. கடந்த மூன்று வாரங்களாக ரெய்னா, அம்பதி ராயுடு ஆகியோர் பயிற்சியில் ஈடுபட்டு வருகின்றனர். இந்நிலையில் அணியின் கேப்டனான  டோனி மார்ச் 1-ம் தேதி அணியுடன் இணைவார் என்று எதிர்பார்க்கப்படுகிறது.

கடந்த ஆண்டு நடைபெற்ற உலக கோப்பை தொடரின் அரையிறுதி போட்டிக்குப் பின் டோனி இந்திய அணியில் இடம் பெறாமல் உள்ளார். மார்ச் 1-ம் தேதி சென்னை வந்து பயிற்சியில் ஈடுபடும் டோனி இரண்டு மூன்று வாரங்கள் பயிற்சி மேற்கொண்ட பின், நான்கு அல்லது ஐந்து நாட்கள் சொந்த ஊர் செல்வார் என்றும், அதன்பின் போட்டி தொடங்குவதற்கு முன் அணியில் இணைவார் என்றும் தகவல்கள் தெரிவிக்கின்றன.