டெல்லியில் மருத்துவமனைகளுக்கு இ மெயிலில் வெடிகுண்டு மிரட்டல் : போலீசார் தீவிர விசாரணை

புது டெல்லி : டெல்லியில் உள்ள பல மருத்துவமனைகளுக்கு நேற்று மின்னஞ்சல்கள் மூலம் வெடிகுண்டு மிரட்டல் விடுக்கப்பட்டது குறித்து போலீசார் தீவிர விசாரணை நடத்தி வருகின்றனர். 

நாடு முழுவதும் சமீப நாட்களாக ரயில் நிலையங்கள், கல்வி நிறுவனங்கள், மருத்துவமனை, விமான நிலையங்கள் உள்ளிட்ட இடங்களுக்கு மர்ம நபர்களால் வெடிகுண்டு மிரட்டல்கள் விடுக்கப்பட்டு வருகின்றன. 

இந்நிலையில், டெல்லியில் உள்ள பல மருத்துவமனைகளுக்கு நேற்று மின்னஞ்சல்கள் மூலம் வெடிகுண்டு மிரட்டல் விடுக்கப்பட்டது.  மத்திய டெல்லியின் சாணக்யா பூரியில் உள்ள நங்லோயில் பகுதியில் உள்ள ஒரு மருத்துவமனையிலிருந்து மதியம் 1.04 மணிக்கும், ப்ரைமஸ் மருத்துவமனையிலிருந்து மதியம் 1.07 மணிக்கும் போலீசாருக்கு வெடிகுண்டு மிரட்டல் குறித்து தகவல் கிடைத்தது.

இதையடுத்து சம்பவ இடத்திற்கு விரைந்து சென்ற போலீசார், தீயணைப்புத் துறையினர், மோப்ப நாய் மற்றும் வெடிகுண்டு நிபுணர்கள் மருத்துவமனைகள் முழுவது தீவிர சோதனை நடத்தினர். மேலும் வெடிகுண்டு மிரட்டல் விடுத்த நபர் குறித்து டெல்லி போலீசார் தீவிர விசாரணை நடத்தி வருகின்றனர்.