சென்னை ஓபன் டென்னிஸ்: காயம் காரணமாக டிப்சரோவிச் விலகல்

சென்னை : சென்னை ஓபன் டென்னிஸ் போட்டியில் இருந்து முன்னணி வீரர்களில் ஒருவரான செர்பியாவை சேர்ந்த ஜான்கோ டிப்சரோவிச் காயம் காரணமாக விலகியுள்ளார்.

சென்னை ஓபன் டென்னிஸ் போட்டி வருகிற 4–ந்தேதி முதல் 10–ந்தேதிவரை நடைபெறுகிறது. செர்பியாவை சேர்ந்த டிப்சரோவிச் காயத்தில் இருந்து இன்னும் முழுமையாக குணமடையாததால் விலகியுள்ளார். 2012–ம் ஆண்டு நடந்த சென்னை ஓபன் போட்டியில் டிப்சரோவிச் சாம்பியன் பட்டம் பெற்றவர் என்பது குறிப்பிடத்தக்கது. அவருக்கு பதிலாக ஸ்பெயினை சேர்ந்த டேனியல் கில்மெனா இடம் பெற்றுள்ளார்.

இதற்கிடையே ஒற்றையர் பிரிவில் நேரடியாக பங்கேற்கும் வகையில் தமிழக வீரர் ராம்குமார் ராமநாதன் வைல்டு கார்டு பெற்றுள்ளார். அவர் தரவரிசையில் 248–வது இடத்தில் உள்ளார். இதேபோல் இரட்டையர் பிரிவில் சோம்தேவ்– ஜீவன் நெடுஞ்செழியன் ஜோடிக்கும், ராம்குமார்– ஸ்ரீராம் ஜோடிக்கும் வைல்டு கார்டு வழங்கப்பட்டுள்ளது.