பெண் காவலர்கள் குறித்து அவதூறு: சவுக்கு சங்கருக்கு நிபந்தனை ஜாமீன்

கோவை : பெண் காவலர்களை அவதூறாக பேசிய வழக்கில் சவுக்கு சங்கருக்கு நிபந்தனை ஜாமீன் வழங்கப்பட்டுள்ளது.

சென்னையைச் சேர்ந்த யூடியூபர் சவுக்கு சங்கர் மற்றொரு யூடியூப் சேனலுக்கு அண்மையில் அளித்த பேட்டியில் பெண் காவலர்கள் மற்றும் காவல் துறை உயர் அதிகாரிகள் குறித்து அவதூறாக கருத்து தெரிவித்ததாக புகார் எழுந்தது.

இது தொடர்பாக கோவை சைபர் கிரைம் போலீஸார் அளித்தப் புகாரின்பேரில் வழக்குப் பதிவு செய்த போலீசார், சவுக்கு சங்கரை கடந்த மே 14ஆம் தேதி கைது செய்தனர். மேலும், அந்த பேட்டியை வெளியிட்ட யூடியூபர் ஃபெலிக்ஸ் ஜெரால்டு என்பவரும் கைது செய்யப்பட்டார்.

இதனிடையே, கோவை சிறையில் அடைக்கப்பட்டுள்ள தங்களை பிணையில் விடுவிக்கக்கோரி கோவை 4-வது குற்றவியல் நீதிமன்றத்தில் சவுக்கு சங்கர், ஃபெலிக்ஸ் ஜெரால்டு ஆகியோர் தனித்தனியாக மனு தாக்கல் செய்தனர். இந்த வழக்கில் சவுக்கு சங்கருக்கு நிபந்தனை ஜாமீன் வழங்கி கோவை 4வது குற்றவியல் நீதிமன்றம் உத்தரவிட்டுள்ளது.