ஒற்றுமையாக இருந்தால் மேகதாது விஷயத்தில் வெற்றி நிச்சயம் : சட்டசபையில் அமைச்சர் துரைமுருகன் பேச்சு

சென்னை : ஒற்றுமையாக இறுதி வரை இருந்தால் நிச்சயம் நாம் வெற்றி பெறுவோம் என்று மேகதாது விவகாரம் குறித்து சட்டசபையில் துரைமுருகன் பேசினார். 

சட்டசபையில் நேற்று மேகதாது விவகாரம் குறித்து அ.தி.மு.க. ஒருங்கிணைப்பாளர் ஓ. பன்னீர் செல்வம் மற்றும் உறுப்பினர்கள் செல்வபெருந்தகை (காங்கிரஸ்), வேல்முருகன் (தமிழக வாழ்வுரிமை கட்சி), மாலி (மார்க்சிஸ்டு கம்யூனிஸ்டு), ராமச்சந்திரன் (இந்திய கம்யூனிஸ்டு), ஜவாஹிருல்லா (மனிதநேய மக்கள் கட்சி), எம்.ஆர்.காந்தி (பா.ஜனதா), ஜி.கே.மணி (பா.ம.க.), ஈஸ்வரன் (கொங்குநாடு மக்கள் கட்சி), சதன்திருமலைகுமார் (ம.தி.மு.க.) ஆகியோர் பேசினர். 

அப்போது மேகதாதுவில் கர்நாடக அரசு அணை கட்டினால் தமிழகத்துக்கு மிகப்பெரிய பாதிப்பு ஏற்படும் என்பதை அவர்கள் விளக்கி கூறினர். இதற்கு பதிலளித்து  அமைச்சர் துரைமுருகன் பேசியதாவது:-

காவிரியில் மேகதாது அணை கட்ட கர்நாடகா முயற்சி எடுப்பது பற்றி பத்திரிகைகளில் வந்த செய்தியின் அடிப்படையில் பல்வேறு கட்சி தலைவர்கள் இங்கு கருத்துகளை தெரிவித்தனர். கட்சி வித்தியாசம் இல்லாமல் நாம் எப்படி  ஒற்றுமையாக இருக்கிறோமோ அப்படி இறுதி வரை இருந்தால் நிச்சயம் இந்த பிரச்சினையில் வெற்றி பெறுவோம் என்ற உறுதியை தெரிவிக்கிறேன்.  எனக்கு நீண்ட நாட்களாக ஒரு ஆதங்கம். கர்நாடக மாநிலத்தில் யார் ஆட்சி மாறினாலும் கட்சி வித்தியாசமின்றி ஒரே மாதிரியாகத் தான் பேசுவார்கள். அதில் வித்தியாசமே இருக்காது. அதுபோல் கேரளாவிலும் வித்தியாசம் இருக்காது. தமிழகத்தில் ஒரு காலத்தில் வித்தியாசம் காணப்பட்டது. அதெல்லாம் இப்போது மறைந்து விட்டது. இப்போது சுமூக உணர்வு ஏற்பட்டுள்ளது.  மற்ற பிரச்சினைகளில் வித்தியாசம் இருந்தாலும் இருமொழி கொள்கையிலும், இந்தியை எதிர்ப்பதிலும், காவிரி பிரச்சினையிலும் நாம் ஒன்றுபட்டு இருப்போமானால் எந்த சக்தியும் தமிழகத்தை வீழ்த்த முடியாது என்பது என்னுடைய வாதம்.

மேகதாது அணை கட்டுவதை தடுத்து நிறுத்த வேண்டும் என்பதில் அனைவரும் உறுதியாகத்தான் உள்ளோம். இதற்காக முதல்வர், பிரதமரையும் சந்தித்து வலியுறுத்தி உள்ளார். என்னையும் அப்போது அழைத்து சென்றார். அதன் பிறகு மத்திய நீர்வளத்துறை அமைச்சரை அனைத்துக்கட்சி தலைவர்களுடன் சென்று பார்த்து வந்தோம். அவர்களும் நம்மிடம் உறுதிமொழி கொடுத்து இருக்கிறார்கள். அடுத்த வாரம் காவிரி ஆணைய குழு கூடுகிறது. அங்கே இந்த பிரச்சினை குறித்து கர்நாடகா விவாதிக்க இருப்பதாக தெரிகிறது. ஆனால் இதுகுறித்து அங்கு பேச முடியாது. பேசக்கூடாது என்பது தமிழகத்தின் திட்டவட்ட கொள்கையாகும். எனவே எது எப்படி இருந்தாலும் தமிழகத்தின் கொள்கையை திட்டவட்டமாக எடுத்து வைப்போம். எதை மறுக்க வேண்டுமோ அதை மறுப்போம். வாதாடி வேண்டிய இடத்தில் வாதாடுவோம்.  இவ்வாறு அவர் பேசினார்.