விரைவில் திருமணம் செய்து கொள்வேன்: பிரச்சாரத்தில் ராகுல்காந்தி கலகல பேச்சு

ரேபரேலி, உத்தர பிரதேசத்தில் நடைபெற்ற தேர்தல் பிரச்சாரத்தின் போது, விரைவில் திருமணம் செய்வேன் என ராகுல் பேசியது அங்கு கலகலப்பான சூழலை ஏற்படுத்தியது.

தற்போது 7 கட்டங்களாக நடைபெற்று பாராளுமன்ற தேர்தலில் 5 ஆவது கட்டமாக தேர்தல் நடைபெற உள்ள உத்தரப் பிரதேசத்தின் ரேபரேலி தொகுதியில் ராகுல் காந்தி போட்டியிடுகிறார். இதற்காக தீவிர பிரச்சாரம் மேற்கொண்டு வரும் அவர் காங்கிரஸ் கட்சியின் பிரச்சாரப் பொதுக் கூட்டத்தில் பேசினார். அப்போது ராகுல் காந்தி திருமணம் குறித்து மேடையில் பதிலளித்த ருசிகர சம்பவம் நிகழ்ந்தது.

ராகுல் காந்தி தீவிரமாக பேசிக் கொண்டிருக்கும்போது இடைமறித்த கூட்டத்தினர், அவரின் திருமணம் குறித்து கோஷம் எழுப்பியதுடன், எப்போது திருமணம் செய்து கொள்ள திட்டமிட்டுள்ளீர்கள் என்று கேள்வி எழுப்பினர். அப்போது அவரது அருகில் இருக்கையில் அமர்ந்திருந்த அவரது சகோதரி பிரியங்கா காந்தி எழுந்து மைக்கின் அருகே சென்றார், முதலில் மக்களின் கேள்விக்கு பதில் கொடு என்று கேலியாகக் கூறி  விட்டு சிரித்தபடியே தனது இருக்கைக்கே மீண்டும் சென்றார். அப்போது மக்களின் கேள்விக்கு பதில் அளிக்கும் விதமாக ராகுல் காந்தி, "நான் விரைவில் திருமணம் செய்துகொள்ள வேண்டும்" என்று மட்டும் தெரிவித்தார். இதனால் கூட்டத்தில் சிரிப்பும் கலகலப்பான சூழலும் ஏற்பட்டது.