வாஷிங்டன் மாகாண கோவிலுக்கு காஞ்சிபுரத்திலிருந்து செல்லும் தங்கத் தேர்

காஞ்சிபுரம் : காஞ்சிபுரத்தில் ரூ. ஒரு கோடியே 25 லட்சம் மதிப்பில் தயாரிக்கப்பட்டுள்ள தங்க முலாம் பூசப்பட்ட 4 டன் எடை கொண்ட தேர்  அமெரிக்காவின் வாஷிங்டன் மாகாணத்தில் உள்ள கோவில் ஒன்றுக்கு அனுப்பி வைக்கப்படுகிறது.

 அமெரிக்காவின் வாஷிங்டன் மாகாணம் சியாட்டில் நகரில் வேதா என்ற கோவில் கட்டப்பட்டு வருகிறது. இந்தக் கோவிலுக்கு காஞ்சிபுரத்தில் இருந்து தங்க முலாம் பூசப்பட்ட தங்கத் தேரை தயாரித்து பெற இந்த கோவில் நிர்வாகிகள் முடிவு செய்தனர்.

அதன்படி காஞ்சியில் உள்ள நிறுவனம் ஒன்றுக்கு இதற்கான வாய்ப்பு வழங்கப்பட்டது. இதனைத் தொடர்ந்து 23 அடி உயரத்தில் 4 டன் எடையில் இரும்பு மற்றும் தாமிரத்தைப் பயன்படுத்தி தங்க மூலம் பூசப்பட்ட தேர் ஒன்றை அந்த நிறுவனம் தயாரித்துள்ளது. 

இந்த தேர் 75 நாட்களில் செய்து முடிக்கப்பட்டுள்ளது. 35 டிகிரி அளவுக்கு திரும்பும் வகையிலான தொழில்நுட்பத்துடன் இத்தேர் வடிவமைக்கப்பட்டுள்ளது. எந்த இடத்துக்கும் எளிதில் கொண்டு செல்லும் வகையில் இந்த தேரை 6 பாகங்களாக பிரிக்க முடியும். 

சிவன், விஷ்ணு என எந்த கடவுளுக்கும் பயன்படுத்தும் வகையில் தேர் அலங்கார பொம்மைகளை பொருத்திக் கொள்ளலாம். இதன் மதிப்பு ரூ.1.25 கோடியாகும். இந்தத் தொகையை சியாட்டில் நகரில் உள்ள வேதா கோவில் நிர்வாகிகள் வழங்கியுள்ளனர். இந்தத் தேர் 6 பாகங்களாக பிரிக்கப்பட்டு  விமானம் மூலம் அமெரிக்காவுக்கு அனுப்பி வைக்கப்படுகிறது.