நீர்வரத்து அதிகரிப்பு: 63 அடியை எட்டும் வைகை அணை நீர்மட்டம்

தேனி : தொடர் மழை காரணமாக நீர்வரத்து அதிகரிப்பால் வைகை அணையின் நீர்மட்டம் 63 அடியை விரைவில் எட்டவுள்ளது. 

தேனி மாவட்டத்தில் கடந்த சில நாட்களாக தொடர்ந்து மழை பெய்து வருகிறது. இதனால் அணைகளுக்கு நீர்வரத்து அதிகரித்து நீர்மட்டமும் வேகமாக உயர்ந்து வருகிறது.  வைகை அணைக்கு தொடர்ந்து நீர்வரத்து அதிகரித்து வருவதால் கடந்த 2 நாட்களில் அணையின் நீர்மட்டம் 2 அடி உயர்ந்துள்ளது. 

நேற்று காலை நிலவரப்படி 62.30 அடியாக உள்ளது. நீர்வரத்து 2745 கன அடி நீர் வருகிற நிலையில் மதுரை மாநகர குடிநீருக்காக மட்டும் 69 கன அடி நீர் திறக்கப்படுகிறது. எனவே விரைவில் அணையின் நீர்மட்டம் 63 அடியை எட்டும் என எதிர்பார்க்கப்படுகிறது.

71 அடி உயரம் கொண்ட வைகை அணையின் நீர்மட்டம் மீண்டும் முழு கொள்ளளவை எட்டும் என விவசாயிகள் நம்பிக்கை தெரிவித்துள்ளனர். இதனால் விவசாய பணிகளில் மும்முரமாக இறங்கியுள்ளனர்.