தி.மு.க. கூட்டணி தொடரும்: திருமாவளவன் திட்டவட்டம்

திருச்சி : மதச்சார்பற்ற கூட்டணி உருவாக்கியதில் எங்களுக்கு பங்கு உண்டு. அது எங்கள் கூட்டணி. எனவே, எங்களுக்கான கூட்டணியை சிதறடிக்க வேண்டிய தேவை வி.சி.க.வுக்கு இல்லை. 2026 சட்டப்பேரவை தேர்தலிலும் தி.மு.க. கூட்டணி தொடரும். கூட்டணி தொடர்பாக இனி பேச வேண்டாம் என வி.சி.க. தலைவர் திருமாவளவன் கூறியுள்ளார்.

விடுதலை சிறுத்தைகள் கட்சியின் தலைவர் தொல்.திருமாவளவன் நேற்று சென்னையில் இருந்து விமானம் மூலம் திருச்சிக்கு வந்தார். அங்கிருந்து அவர் அரியலூர் மாவட்டம் புறப்பட்டுச் சென்றார். அதற்கு முன்பாக திருச்சி விமான நிலையத்தில் செய்தியாளர்களைச் சந்தித்த அவர் கூறியதாவது: 

கூட்டணி தொடர்பாக பேசுவதற்கு எந்த தேவையும் எழவில்லை. ஏற்கெனவே நாங்கள் ஏழு ஆண்டுகளாக தொடர்ந்து தி.மு.க. கூட்டணியில் இருந்து வருகிறோம். அகில இந்திய அளவில் இண்டியா கூட்டணியில் ஒரு அங்கமாக உள்ளோம். இரண்டு கூட்டணிகளை உருவாக்கியதிலும் விடுதலைச் சிறுத்தைகளுக்கு பங்கு உண்டு.

நாங்கள் உருவாக்கிய கூட்டணிகளை மேலும் பலப்படுத்த வேண்டும். முன்னெடுத்துச் செல்ல வேண்டும் என்பதில் தான் என்னுடைய கவனம் இருக்கிறது. இந்தக் கூட்டணிகளை விட்டு விட்டு இன்னொரு கூட்டணிக்குச் செல்ல வேண்டும் என்ற தேவையில்லை. ஏற்கெனவே பலமுறை நான் சுட்டிக்காட்டியுள்ளேன். 

திட்டமிட்டு விடுதலை சிறுத்தைகள் மீது சந்தேகத்தை ஏற்படுத்துகிற முயற்சியில் சிலர் ஈடுபட்டு வருகின்றனர். நம்பகத்தன்மையற்ற நிலையை மேற்கொள்ள முயற்சிக்கின்றனர். இதை நான் முற்றிலுமாக மறுக்கிறேன்.  நாங்கள் எடுத்த நிலைப்பாட்டில் உறுதியாக உள்ளோம் மதச்சார்பற்ற கூட்டணி உருவாக்கியதில் எங்களுக்கு பங்கு உண்டு. அது எங்கள் கூட்டணி. 

எனவே, எங்களுக்கான கூட்டணியை சிதறடிக்க வேண்டிய தேவை வி.சி.க.வுக்கு இல்லை. 2026-ல் நடைபெறும் சட்டப்பேரவை தேர்தலிலும் தி.மு.க. கூட்டணி தொடரும். கூட்டணி தொடர்பாக இனி கேட்க வேண்டாம்  என்று அவர் கூறினார்.