நில முறைகேடு விவகாரம்: இன்று லோக் ஆயுக்தா விசாரணைக்கு ஆஜராவேன்: சித்தராமையா

மைசூரு, லோக் ஆயுக்தா விசாரணைக்கு இன்று காலை ஆஜராவதாக கர்நாடக முதல்வர் சித்தராமையா தெரிவித்துள்ளார் ",

கர்நாடகத்தில் சித்தராமையா (76) தலைமையில் காங்கிரஸ் ஆட்சி நடைபெற்று வருகிறது. முதல்வர்  சித்தராமையாவின் மனைவி பார்வதிக்கு, மைசூரு நகர்ப்புற மேம்பாட்டு ஆணையம் (மூடா) 14 வீட்டுமனைகளை ஒதுக்கி இருந்தது. இதில், முறைகேடு நடந்திருப்பதாக குற்றச்சாட்டுகள் எழுந்தன.

முடா வீட்டு மனைகள் ஒதுக்கீடு செய்யப்பட்டதில் முறைகேடு நடந்துள்ளதாகவும்  இந்த விவகாரத்தில் விசாரணை நடத்தப்பட வேண்டும் என்றும் சமூக ஆர்வலர்கள் அம்மாநில கவர்னரிடம் மனு அளித்தனர். 

இந்த விசாரணைக்குத் தடை கோரி கர்நாடக ஐகோர்ட்டில் சித்தராமையா வழக்கு தொடர்ந்தார். இருப்பினும், விசாரணைக்கு தடை விதிக்க மறுத்த கர்நாடக ஐகோர்ட்டு, விசாரணையைத் தொடர்ந்து நடத்த அனுமதித்தது.

இந்த வழக்கை லோக் அயுக்தா போலீஸ் விசாரித்து வருகின்றனர். இதற்கிடையே முடா நிலமோசடி வழக்கு தொடர்பான விசாரணைக்காக இன்று 6-ம் தேதி விசாரணைக்கு நேரில் ஆஜராக கர்நாடக முதல்வர்  சித்தராமையாவுக்கு லோக் ஆயுக்தா போலீஸ் சம்மன் அனுப்பியது.

இந்நிலையில், லோக் ஆயுக்தாவின் நோட்டீசை ஏற்று, இன்று காலை 10 மணிக்கு விசாரணைக்கு நேரில் ஆஜராகவுள்ளதாக சித்தராமையா தெரிவித்துள்ளார். முன்னதாக கடந்த மாதம் 25-ம் தேதி சித்தராமையாவின் மனைவி பார்வதியிடம் விசாரணை நடத்தப்பட்ட நிலையில், இப்போது அம்மாநில முதல்வருக்கும் சம்மன் அனுப்பப்பட்டுள்ளது குறிப்பிடத்தக்கது.