98 சதவீத 2,000 ரூபாய் நோட்டுகள் வங்கிக்கு திரும்பி விட்டன : ரிசர்வ் வங்கி தகவல்

மும்பை : 98.04 சதவீத 2 ஆயிரம் ரூபாய் நோட்டுகள் வங்கிகளுக்கு திரும்பி இருப்பதாக ரிசர்வ் வங்கி தலைமை பொதுமேலாளர் புனீத் பஞ்சோலி வெளியிட்டுள்ள அறிக்கையில் தெரிவித்துள்ளார். 

நாடு முழுவதும் புழக்கத்தில் இருந்த 2,000 ரூபாய் நோட்டுகளை திரும்பப் பெறுவதாக ரிசர்வ் வங்கி கடந்த ஆண்டு மே மாதம் அறிவித்தது. இந்த நோட்டுகளை பொதுமக்கள் தங்கள் வங்கி கணக்கில் செலுத்தவோ, வங்கிகளில் மாற்றவோ செய்யலாம் என அறிவித்தது. 

இதற்காக கடந்த ஆண்டு அக்டோபர் 7-ம் தேதி வரை அவகாசமும் அளிக்கப்பட்டது. பின்னர் ரிசர்வ் வங்கி அலுவலகங்கள் மூலம் மாற்றிக்கொள்ளவும் பல்வேறு கட்டமாக அறிவிப்புகளை வழங்கியது. அத்துடன் வங்கிக்கு திரும்பிய 2,000 ரூபாய் நோட்டுகள் குறித்த விவரங்களை ரிசர்வ் வங்கி அவ்வப்போது வெளியிட்டு வருகிறது.

அந்தவகையில் கடந்த 31-ம் தேதி வரை வங்கிக்கு திரும்பிய 2,000 ரூபாய் நோட்டு விவரங்களை ரிசர்வ் வங்கி வெளியிட்டு உள்ளது. அதன்படி மொத்தம் ரூ.3.56 லட்சம் கோடி மதிப்பிலான 2,000 ரூபாய் நோட்டுகள் புழக்கத்தில் இருந்த நிலையில், தற்போது ரூ.6,970 கோடி மதிப்பிலான நோட்டுகள் வங்கிக்கு திரும்பவில்லை என கூறப்பட்டு உள்ளது. 

இதன் மூலம் 98.04 சதவீத நோட்டுகள் வங்கிகளுக்கு திரும்பி இருப்பதாக ரிசர்வ் வங்கி தலைமை பொதுமேலாளர் புனீத் பஞ்சோலி வெளியிட்டுள்ள அறிக்கையில் கூறியுள்ளார்.