அடிலெய்டு 2-வது டெஸ்ட்: முதல் இன்னிங்சில் இந்தியா 180 ரன்களுக்கு ஆல் அவுட்

அடிலெய்டு : ஆஸ்திரேலியாவுக்கு எதிரான அடிலெய்டு 2-வது டெஸ்ட் போட்டியில்  ஸ்டார்க் அபார பந்துவீச்சில் முதல் இன்னிங்சில் இந்திய அணி 180 ரன்களில் ஆல் அவுட் ஆனது. ஸ்டார்க் 6 விக்கெட்டுகள் வீழ்த்தினார். முதல் நாள் ஆட்ட முடிவில் ஆஸ்திரேலியா ஒரு விக்கெட் இழப்புக்கு 86 ரன்களை எடுத்துள்ளது.

பகலிரவு போட்டி...

இந்தியா - ஆஸ்திரேலியா இடையிலான பார்டர் - கவாஸ்கர் கோப்பை தொடரின் 2-வது டெஸ்ட் போட்டி அடிலெய்டு மைதானத்தில் நேற்று தொடங்கியது. பகலிரவு போட்டியாக நடைபெறும் இந்த ஆட்டத்திற்கான டாஸ் வென்ற இந்திய அணியின் கேப்டன் ரோகித் சர்மா முதலில் பேட்டிங் செய்வதாக அறிவித்தார். அதன்படி முதல் இன்னிங்சை தொடங்கிய இந்திய அணிக்கு முதல் பந்திலேயே அதிர்ச்சி காத்திருந்தது. ஸ்டார்க் வீசிய முதல் பந்திலேயே ஜெய்ஸ்வால் விக்கெட்டை பறிகொடுத்தார். இதனையடுத்து 2-வது விக்கெட்டுக்கு கை கோர்த்த கேஎல் ராகுல் - கில் நிதான ஆட்டத்தை வெளிப்படுத்தினர்.

ராகுல் 37 ரன்கள்...

இவர்கள் இணைந்து 2-வது விக்கெட்டுக்கு 69 ரன்கள் பார்ட்னர்ஷிப் அமைத்த நிலையில் கே.எல். ராகுல் 37 ரன்களில் ஆட்டமிழந்தார். அவரை தொடர்ந்து களமிறங்கிய விராட் கோலி நிலைக்கவில்லை. அவர் 7 ரன்களில் ஆட்டமிழந்தார். மூவரின் விக்கெட்டுகளையும் ஸ்டார்க் வீழ்த்தினார். சிறிது நேரத்திலேயே கில்லும் 31 ரன்களில் ஆட்டமிழக்க இந்திய அணி மீண்டும் தடுமாறியது.

ஸ்டார்க் அபாரம்...

இதனையடுத்து களமிறங்கிய வீரர்களில் பண்ட் 21 ரன்களிலும், ரோகித் சர்மா 3 ரன்களிலும், அஸ்வின் 22 ரன்களிலும் அவுட்டாகினார். இறுதி கட்டத்தில் நிதிஷ் ரெட்டி அதிரடியாக விளையாடி அணிக்கு விரைவாக ரன்களை சேர்த்தார். முடிவில் முதல் இன்னிங்சில் இந்திய அணி 180 ரன்களில் ஆல் அவுட் ஆனது. அதிகபட்சமாக நிதிஷ் ரெட்டி 42 ரன்கள் அடித்தார். ஆஸ்திரேலிய தரப்பில் அதிகபட்சமாக ஸ்டார்க் 6 விக்கெட்டுகள் வீழ்த்தி அசத்தினார். 

86 ரன்கள்....

இதனையடுத்து தனது முதல் இன்னிங்சை ஆஸ்திரேலியா தொடங்கியது. ஆஸ்திரேலியாவின் தொடக்க வீரர்களாக உஸ்மான் கவாஜா மற்றும் மெக்ஸ்வீனி களம் இறங்கினர். இதில் கவாஜா 13 ரன்னில் அவுட் ஆனார். தொடர்ந்து லபுஸ்சேன் களம் இறங்கினார். மெஸ்வீனி - லபுஸ்சேன் இணை நிதானமாக ஆடி ரன்கள் சேர்த்தது. இறுதியில் முதல் நாள் ஆட்ட நேர முடிவில் ஆஸ்திரேலியா 1 விக்கெட்டை மட்டும் இழந்து 86 ரன்கள் எடுத்துள்ளது. ஆஸ்திரேலியா தரப்பில் மெக்ஸ்வீனி 38 ரன்னுடனும், லபுஸ்சேன் 20 ரன்னுடனும் களத்தில் உள்ளனர். இந்தியா தரப்பில் பும்ரா 1 விக்கெட் வீழ்த்தினார். ஆஸ்திரேலியா இன்னும் 94 ரன்கள் பின்னிலையில் உள்ளது. நாளை 2ம் நாள் ஆட்டம் நடைபெறுகிறது.