தமிழகத்தில் 10 மாவட்டங்களில் மிக கனமழைக்கு வாய்ப்பு

சென்னை : தமிழகத்தில் வெப்ப சலனம் காரணமாக 3 மாவட்டங்களில் மிக கனமழையும், 7 மாவட்டங்களில் கனமழையும் பெய்ய வாய்ப்பு உள்ளதாக தெரிவித்துள்ள சென்னை வானிலை மையம், வட கடலோர மாவட்டங்களில் வெப்பநிலை அதிகரிக்கக்கூடும் என தெரிவித்து உள்ளது. 

இது தொடர்பாக வானிலை மையம் வெளியிட்ட அறிக்கையில் கூறப்பட்டு உள்ளதாவது:-

வெப்பச்சலனம் மற்றும் வளிமண்டல சுழற்சியால், அடுத்த 24 மணி நேரத்தில், தர்மபுரி, சேலம், கிருஷ்ணகிரி மாவட்டங்களில் ஓரிரு இடங்களில் மிக கனமழை பெய்ய வாய்ப்பு உள்ளது.  மேலும், ஈரோடு, திருப்பத்தூர், வேலூர், ராணிப்பேட்டை, திருவள்ளூர், திருச்சி, திருவண்ணாமலை மாவட்டங்களில் கனமழை பெய்யக்கூடும். உள் மாவட்டங்கள், மேற்கு தொடர்ச்சி மலை ஒட்டிய மாவட்டங்கள், கடலோர மாவட்டங்களில் மிதமான மழைக்கு வாய்ப்பு உள்ளது. 

சென்னையில் வானம் ஓரளவு மேகமூட்டத்துடன் காணப்படும். நகரின் ஒரு சில இடங்களில் மிதமான மழை பெய்யக்கூடும். இன்று 22-ம் தேதி தமிழகம் புதுச்சேரி காரைக்கலில் ஒரு சில இடங்களில் மிதமான மழையும், நாளை 23 கடலோர மாவட்டங்கள், நீலகிரி, தேனி, ஈரோடு, கிருஷ்ணகிரி மாவட்டங்களில் ஒரிரு இடங்களில் மிதமான மழையும், 24-ம் தேதி  மேற்கு தொடர்ச்சி மலை ஒட்டிய மாவட்டங்களில் ஓரிரு இடங்களில் மிதமான மழையும், 25-ம் தேதி தேனி, திண்டுக்கல், தென்காசி மாவடடங்களில் ஒரிரு இடங்களில் கனமழை முதல் மிக கனமழையும் பெய்ய வாய்ப்பு உள்ளது.

வட கடலோர மாவட்டங்களில் 2-ல் இருந்து 4 டிகிரி செல்சியஸ் வரை வெப்பநிலை அதிகரிக்கும். தென் தமிழக கடற்பகுதி, மன்னார் வளைகுடா, தென்மேற்கு வங்க்கடல்,தமிழக கடலோர பகுதிகளில் பலத்த காற்று வீசும் என்பதால், அந்த பகுதிகளுக்கு மீனவர்கள் செல்ல வேண்டாம். கடந்த 24 மணி நேரத்தில் சேத்தியாத்தோப்பில் 10 செ.மீ., மூங்கில் துறைப்பட்டு 9 செ.மீ., அரியலூரில் 8 செ.மீ., தியாகதுருகத்தில் 7 செ.மீ., மழையும் பதிவாகி உள்ளது. இவ்வாறு அந்த அறிக்கையில் கூறப்பட்டு உள்ளது.