சாரணர் இயக்கத்தின் நிறுவன நாள்: துணை முதல்வர் உதயநிதி ஸ்டாலின் கொடி, இலச்சினை வெளியிட்டார்

தஞ்சாவூர், சாரண, சாரணியர் இயக்கத்தின் 75-வது நிறுவன நாளையொட்டி கொடி மற்றும் இலச்சினை தஞ்சையில் நடந்த நிகழ்ச்சியில் துணை முதல்வர் உதயநிதி ஸ்டாலின் நேற்று வெளியிட்டார்.

தமிழ்நாடு பாரத சாரண, சாரணியர் இயக்கத்தின் சார்பாக 75-வது நிறுவன நாள் தஞ்சாவூர் மாவட்டத்தில் நேற்று நடைபெற்றது. இந்நிகழ்ச்சியில் பாரத சாரண, சாரணியர் இயக்கம் சார்பாக திருச்சிராப்பள்ளி மாவட்டம், மணப்பாறை சிப்காட் வளாகத்தில் நடைபெறவுள்ள பாரத சாரண, சாரணியர் இயக்கத்தின் வைரவிழா மற்றும் கலைஞர் நூற்றாண்டு விழா சிறப்புப் பெருந்திரளணியின் தலைவராக, துணை முதல்வர்  உதயநிதி ஸ்டாலின் பதவியேற்றுக் கொண்டார். 

மேலும் சாரண, சாரணியர் இயக்கத்தின் 75-வது நிறுவன நாள் கொடி, சிறப்புப் பெருந்திரளணியின் முதல் அறிவிப்பு இதழ் மற்றும்  இலச்சினை ஆகியவற்றை துணை முதல்வர் உதயநிதி ஸ்டாலின் வெளியிட, உயர்கல்வித்துறை அமைச்சர் கோவி. செழியன், பாரத சாரண, சாரணியர் இயக்கத்தின் மாநிலத் தலைவர் மற்றும் பள்ளிக் கல்வித் துறை அமைச்சர் அன்பில் மகேஸ் பொய்யாமொழி, தொழில், முதலீட்டு ஊக்குவிப்பு மற்றும் வர்த்தகத் துறை அமைச்சர் டி.ஆர்.பி. ராஜா ஆகியோர் பெற்றுக் கொண்டனர்.