ஒபாமா - தலாய்லாமா சந்திப்பு: அமெரிக்க தூதரகத்திடம் எதிர்ப்பை தெரிவித்த சீனா

பெய்ஜிங்  - அமெரிக்க ஜனாதிபதி ஒபாமா மற்றும் திபெத்திய மத தலைவர் தலாய் லாமா இடையே வெள்ளை மாளிகையில் நடைபெற திட்டமிடப்பட்ட சந்திப்பு குறித்து அமெரிக்க தூதரகத்தில் தனது எதிர்ப்பினை சீனா பதிவு செய்து உள்ளது. திபெத்தில் இருந்து வெளியேறி இந்தியாவில் வசித்து வரும் திபெத்திய புத்த மத தலைவர் தலாய் லாமாவை ஆபத்து நிறைந்த பிரிவினைவாதி என சீனா கருதுகிறது.

இது பற்றி சீன வெளியுறவு அமைச்சக செய்தி தொடர்பாளர் லூ கேங் கூறுகையில், இந்த சந்திப்பு பிரிவினைவாத சக்திகளுக்கு தவறான தகவலை அனுப்பிடும் என கூறியுள்ளார்.  திபெத்திய விவகாரத்தில் தங்களுக்கு சாதகம் ஆக்க மேற்கொள்ளும் மற்றும் ஸ்திர தன்மையை குழிதோண்டி புதைக்கும் எந்தவொரு முயற்சியும் வெற்றி பெறாது என்றும் லூ கூறியுள்ளார்.