ரூ.327.69 கோடி மதிப்பில் 2,404 புதிய அடுக்குமாடிகள் முதல்வர் மு.க.ஸ்டாலின் அடிக்கல்

சென்னை: ரூ.327.69 கோடி செலவில் கட்டப்பட உள்ள 2,404 புதிய அடுக்குமாடி குடியிருப்புகளுக்கு முதல்வர் மு.க.ஸ்டாலின் காணொலிக் காட்சி வாயிலாக அடிக்கல் நாட்டினார்.

சென்னை, தலைமைச் செயலகத்தில் புதன்கிழமை (ஜன.29) பல்வேறு துறை சார்ந்த திட்டங்களை தொடங்கி வைத்தார். வருவாய் மற்றும் பேரிடர் மேலாண்மைத் துறை சார்பில் மயிலாடுதுறை மாவட்டம், மயிலாடுதுறையில் மற்றும் நாகப்பட்டினம் மாவட்டம், நாகப்பட்டினத்தில் ரூ. 8 கோடியே 58 லட்சத்து 39 ஆயிரம் செலவில் கட்டப்பட்டுள்ள 2 வட்டாட்சியர் அலுவலகக் கட்டடங்கள் மற்றும் ரூ.7 கோடியே 47 லட்சத்து 21 ஆயிரம் செலவில் கட்டப்பட்டுள்ள 25 வருவாய் ஆய்வாளர் அலுவலகத்துடன் கூடிய குடியிருப்புகள் ஆகியவற்றை திறந்து வைத்தார்.

வீட்டுவசதி மற்றும் நகர்ப்புற வளர்ச்சித் துறையின் கீழ் செயல்படும் தமிழ்நாடு நகர்ப்புற வாழ்விட மேம்பாட்டு வாரியத்தின் சார்பில் ரூ.327 கோடியே 69 லட்சம் செலவில் கட்டப்படவுள்ள 2,404 புதிய அடுக்குமாடி குடியிருப்புகளுக்கு காணொலிக் காட்சி வாயிலாக அடிக்கல் நாட்டினார்.

தொடர்ந்து மீன்வளம் மற்றும் மீனவர் நலத் துறை சார்பில் ரூ.58 கோடியே 50 லட்சம் செலவில் மேம்படுத்தப்பட்ட மீன் இறங்குதளங்கள், மீன் விதைப் பண்ணைகள் மற்றும் அலுவலகக் கட்டடங்கள் என 10 முடிவுற்ற திட்டப் பணிகள், பால்வளத் துறை சார்பில் விருதுநகர் மாவட்டம், சூலக்கரை கிராமத்தில் ரூ.15 கோடியே 43 லட்சம் செலவில் புதிதாக கட்டப்பட்டுள்ள நாளொன்றுக்கு 50 மெட்ரிக் டன் உற்பத்தித் திறன் கொண்ட கால்நடை தீவன தொழிற்சாலை ஆகியவற்றை திறந்து வைத்தும், திருநெல்வேலி மாவட்டம், கூடுதாழை கிராமத்தில் ரூ.15 கோடி மதிப்பீட்டில் தூண்டில் வளைவுடன் கூடிய மீன் இறங்குதளம் அமைக்கும் பணிக்கு அடிக்கல் நாட்டினார்.

கைத்தறி, கைத்திறன், துணிநூல் மற்றும் கதர்த் துறை சார்பில் சென்னை எழும்பூரில் உள்ள கோ-ஆப்டெக்ஸ் வளாகத்தில் ரூ.227 கோடி மதிப்பீட்டில் கட்டப்படவுள்ள ஒருங்கிணைந்த வளாகத்திற்கு அடிக்கல் நாட்டினார்.

இந்து சமய அறநிலையத் துறை சார்பில், 2024 – 2025 ஆம் நிதியாண்டிற்கு தேர்வு செய்யப்பட்டுள்ள 1,250 கிராமப்புறத் திருக்கோயில்கள் மற்றும் 1,250 ஆதிதிராவிடர் மற்றும் பழங்குடியினர் வசிக்கும் பகுதியிலுள்ள திருக்கோயில்களில் திருப்பணிகளை மேற்கொள்ள உயர்த்தப்பட்ட நிதியுதவி தலா ரூ.2.5 லட்சம் வீதம் மொத்தம் ரூ.62.50 கோடி வழங்கிடும் அடையாளமாக 12 திருக்கோயில்களின் நிர்வாகிகள் மற்றும் பூசாரிகளிடம் திருப்பணிக்கான வரைவோலைகளை வழங்கினார்.