ஸ்டீவ் ஸ்மித் 35-வது சதம்

வார்னே - முரளிதரன் டிராபியில் தொடரின் முதல் டெஸ்ட் போட்டியில் காலேயில் நடைபெறுகிறது. டாஸ் வென்ற ஆஸ்திரேலிய அணி பேட்டிங்கைத் தேர்வு செய்து விளையாடி வருகிறது. 80 ஓவர் முடிவில் ஆஸி. அணி 322/ 2 ரன்கள் எடுத்துள்ளது. இதில் டிராவிஸ் ஹெட் 57, லபுஷேன் 20 ரன்களுக்கு ஆட்டமிழந்தார்கள். கவாஜா, ஸ்டீவ் ஸ்மித் சதமடித்து விளையாடி வருகிறார்கள். கவஜா 142, ஸ்டீவ் ஸ்மித் 102 ரன்களுடன் விளையாடி வருகிறார்கள். 

ஸ்டீவ் ஸ்மித் இந்தப் போட்டியில் 10,000 ரன்களை கடந்தது மட்டுமில்லாமல் தனது 35ஆவது சதத்தினையும் நிறைவு செய்துள்ளார். சுழற்பந்து வீச்சாளர் மேத்யூ குஹ்னெமன் மற்றும் டாட் மர்பி, ஜோஷ் இங்கிலிஸ் ஆகியோர் முதல்முறையாக ஆஸ்திரேலிய டெஸ்ட் அணிக்கு அறிமுகமாகின்றனர். பாட் கம்மின்ஸ் தலைமையிலான ஆஸ்திரேலிய அணியில் அங்கம் வகித்த பியூ வெப்ஸ்டரும் இந்தத் தொடருக்கான அணியில் இடம்பிடித்துள்ளதும் குறிப்பிடத்தக்கது.

_________________________________________________________________________________

அமராவதியில் கிரிக்கெட் திடல்

ஆந்திர மாநில தலைநகரான அமராவதியில், அகமதாபாத்தில் உள்ள நரேந்திர மோடி திடலை மிஞ்சும் வகையில், 1.32 லட்சத்துக்கும் அதிகமான இருக்கைகள் கொண்ட நாட்டிலேயே மிகப்பெரிய கிரிக்கெட் திடலுக்கான திட்டங்களை ஆந்திர கிரிக்கெட் சங்கம் அறிவித்துள்ளது. 

அவ்வாறு மிகப்பெரிய திடல் அமையும் பட்சத்தில் உலகிலேயே மிகப்பெரிய கிரிக்கெட் திடல் என்ற புதிய வரலாற்றையும் உருவாக்க உள்ளது அமராவதி கிரிக்கெட் திடல். இதுகுறித்து ஆந்திர கிரிக்கெட் சங்கத் தலைவர் கேசினேனி சிவந்த் செய்தியாளர் சந்திப்பில் பேசுகையில், “அமராவதியில் 60 ஏக்கர் நிலம், திடல் கட்ட ஆந்திர மாநில அரசிடம் இருந்து கோரப்பட்டுள்ளது. வடக்கு கடலோர ஆந்திரம், விஜயவாடா மற்றும் ராயலசீமா உள்ளிட்ட 3 இடங்களில் மூன்று தனித்தனி கிரிக்கெட் அகாடமிகள் நிறுவப்படும் என்றார்.

_________________________________________________________________________________

வருண் சக்ரவர்த்தி சாதனை 

இங்கிலாந்து அணிக்கு எதிரான 3-வது டி-20 போட்டியில் இந்திய சுழற்பந்து வீச்சாளர் வருண் சக்ரவர்த்தி சர்வதேச டி20 போட்டியில் 5 விக்கெட் எடுப்பது இது 2-வது (ஏற்கனவே தென் ஆப்பிரிக்காவுக்கு எதிராக) முறையாகும். ஆனால் அந்த 2 போட்டிகளிலும் இந்திய அணி தோல்வியையே சந்தித்துள்ளது.

இதன் மூலம் சர்வதேச டி20 கிரிக்கெட் வரலாற்றில் தோல்வியடைந்த போட்டிகளில்  இரண்டு முறை 5 விக்கெட்டுகளை வீழ்த்திய முதல் பந்துவீச்சாளர் என்ற வித்தியாசமான சாதனையை வருண் சக்ரவர்த்தி படைத்துள்ளார்.