சாம்பியன்ஸ் டிராபியில் பும்ரா விளையாடுவாரா? - பி.சி.சி.ஐ. எடுத்த முக்கிய முடிவு

மும்பை : சாம்பியன்ஸ் டிராபி தொடரில் பும்ரா விளையாடுவது குறித்து புதிய தகவல் வெளியாகியுள்ளது.

சாம்பியன்ஸ் கோப்பை...

9-வது ஐ.சி.சி. சாம்பியன்ஸ் கோப்பை கிரிக்கெட் தொடர் வருகிற 19-ம் தேதி முதல் மார்ச் 9-ம் தேதி வரை பாகிஸ்தான் மற்றும் துபாயில் நடைபெற உள்ளது. இதில் பங்கேற்கும் 8 அணிகள் இரு பிரிவாக பிரிக்கப்பட்டுள்ளன. 'ஏ' பிரிவில் இந்தியா, பாகிஸ்தான், நியூசிலாந்து, வங்காளதேசம் அணிகளும், 'பி' பிரிவில் ஆஸ்திரேலியா, இங்கிலாந்து, தென் ஆப்பிரிக்கா, ஆப்கானிஸ்தான் அணிகளும் இடம் பெற்றுள்ளன.

பிப். 19-ந்தேதி தொடக்கம்...

பிப்ரவரி 19-ந்தேதி கராச்சியில் தொடங்கும் முதல் ஆட்டத்தில் நடப்பு சாம்பியன் பாகிஸ்தான் அணி, நியூசிலாந்தை சந்திக்கிறது. இந்த தொடரில் இந்திய அணிக்குரிய ஆட்டங்களும் , முதலாவது அரையிறுதியும் துபாயில் நடைபெற உள்ளன. பாதுகாப்பு அச்சுறுத்தலால் இந்திய அணி பாகிஸ்தானுக்கு செல்ல மறுத்ததால் இந்திய அணிக்குரிய ஆட்டங்கள் மட்டும் துபாய்க்கு மாற்றப்பட்டுள்ளது.

ஐ.சி.சி. கெடு... 

இந்த தொடரில் பங்கேற்க உள்ள அனைத்து அணிகளும் ஏற்கனவே அறிவிக்கப்பட்டு விட்டன. இருப்பினும் அந்த அணியில் ஏதாவது மாற்றங்கள் இருந்தால் வருகிற 11-ஆம் தேதிக்குள் மாற்றி அமைத்துக் கொள்ளலாம் என்று ஐ.சி.சி. கெடு விதித்திருக்கிறது. இதன் காரணமாக அனைத்து கிரிக்கெட் வாரியங்களும் தங்களது அணியில் காயமடைந்துள்ள வீரர்களுக்கு பதிலாக மாற்று வீரர்களை தேர்வு செய்யும் முயற்சியில் ஈடுபட்டுள்ளன.

பும்ரா விளையாடுவாரா?... 

இந்த தொடருக்கான இந்திய அணியில் ஜஸ்பிரித் பும்ரா இடம் பிடித்திருந்தாலும், அவர் இந்த தொடரில் விளையாடுவாரா? என்பதில் சந்தேகம் நிலவுகிறது. கடந்த ஆஸ்திரேலியா டெஸ்ட் தொடரில் 5-வது போட்டியின்போது முதுகு பகுதியில் பும்ரா காயம் அடைந்தார். இதனால் இங்கிலாந்துக்கு எதிரான ஒருநாள் தொடரில் விளையாடுவதற்காக தேர்வு செய்யப்பட்டிருந்த அவர் நீக்கப்பட்டுள்ளார்.

காத்திருக்க முடிவு... 

இதனால் அவர் சாம்பியன்ஸ் டிராபி தொடரில் விளையாடுவார? அவரது விஷயத்தில் பி.சி.சி.ஐ. எடுத்துள்ள முடிவு என்ன? என்பது குறித்து முக்கிய தகவல் வெளியாகியுள்ளது. அதன்படி, கடந்த ஒருநாள் உலகக்கோப்பை தொடரின்போது காயமடைந்த ஹர்திக் பாண்ட்யாவுக்காக கடைசிவரை காத்திருந்தது போல, பும்ராவுக்காகவும் கடைசி வரை காத்திருக்க பி.சி.சி.ஐ. முடிவு செய்துள்ளதாக தகவல் வெளியாகி உள்ளது. அவர் விளையாட வாய்ப்பில்லை என்பது 100 சதவீதம் உறுதியான பின்னரே அவருக்கான மாற்று வீரர் அறிவிக்கப்படுவார் என்றும் கூறப்பட்டுள்ளது. அவர் விளையாடுவதற்கு 1 சதவீதம் வாய்ப்பிருந்தாலும் அவரை களமிறக்க பி.சி.சி.ஐ. ஆர்வம் காட்டுகிறது.