மாடன் கொடை விழா - விமர்சனம்

திருநெல்வேலி மாவட்டத்தில் உள்ள ஒரு கிராமத்தில் சுடலை மாட சாமியின் கொடை விழா நடக்கிறது. அப்போது தெருக்கூத்து கலஞரான திருநங்கை ஒருவர் மர்மமாக  இறக்கிறார். அன்றிலிருந்து அங்கு கொடை விழா நடக்காமல் போகிறது. பல வருடங்களாக நடக்காமல் இருக்கும் கொடை விழாவை மீண்டும் நடத்த வேண்டும் என்ற முடிவுடன் வருகிறார் நாயகன்  கோகுல் கவுதம். அதற்கு இடைஞ்சலாக இருக்கிறார் ஊர் தலைவரான சூரிய நாராயணன். கொடை விழா நடத்தும்  முயற்சியில் ஈடுபடும் போது நாயகன் மீது கொலைப்பழி விழுகிறது. அதனால் சிறைக்கு செல்லும் நாயகன் திரும்பி வந்து மாடன் கொடை விழாவை நடத்தினாரா?, திருநங்கை மரணத்தின் பின்னணி யார் என்பதை கண்டு பிடித்தாரா ஆகிய கேள்விகளுக்கான விடைதான் படத்தின் கிளைமாக்ஸ். நாயகனாக நடித்திருக்கும் அறிமுக நடிகர் கோகுல் கவுதம், மண்ணின் மைந்தராக, கதாபாத்திரத்திற்கு சரியான தேர்வாக இருக்கிறார். காதல் காட்சிகளில் சற்று தயக்கத்துடன் நடித்திருக்கிறார். நாயகியாக நடித்திருக்கும் ஷர்மிஷா மிடுக்காக அசத்தலாக நடித்திருக்கிறார். சூப்பர் குட் சுப்பிரமணியம், ஸ்ரீப்ரியா சிவவேலன், பால்ராஜ், மாரியப்பன், ரஷ்மிதா என அனைவரும் எதார்த்த நடிப்பை கொடுத்திருக்கிறார்கள். விபின். ஆர் இசை அருமை. எழுதி இயக்கியிருக்கும் இரா.தங்கபாண்டி கிராமத்து வாழ்வியலின் ஒரு பகுதியை கதைக்களமாக எடுத்துக் கொண்டு அதை திரை மொழியில் நேர்த்தியான படைப்பாக கொடுத்திருக்கிறார். மொத்தத்தில், இந்த ‘மாடன் கொடை விழா’ நம் மண் சார்ந்த படைப்பு.