விசைத்தறி உரிமையாளர்கள் பிரச்சினையைத் தீர்க்க அரசு நடவடிக்கை: அமைச்சர் தகவல்

சென்னை, “விசைத்தறி உரிமையாளர்கள் பிரச்சினையைத் தீர்க்க எல்லா நடவடிக்கைகளையும் அரசு எடுத்து வருகிறது” என்று சட்டப்பேரவையில் அ.தி.மு.க. கொண்டு வந்த கவன ஈர்ப்பு தீமானத்துக்கு அமைச்சர் தங்கம் தென்னரசு பதில் அளித்துள்ளார்.

தமிழக சட்டப்பேரவையில் நேற்று (ஏப்.17) நேரமில்லா நேரத்தின்போது, கோவை, திருப்பூரில் நடைப்பெற்று வரும் விசைத்தறி உரிமையாளர்கள் போராட்டம் தொடர்பாக எதிர்க்கட்சி தலைவர் பழனிசாமி கவன ஈர்ப்பு தீர்மானம் கொண்டு வந்து பேசினார்.

அப்போது, “கோவை, திருப்பூர் மாவட்டங்களில் சுமார் 1.5 லட்சம் கூலிக்கு நெசவு செய்யும் விசைத்தறிகள் இயங்கி வருகின்றன. இவர்கள் 2024-ம் ஆண்டு ஜனவரி முதல் கூலி உயர்வு கேட்டு போராடி வருகின்றனர்.  கடந்த ஜன.12 முதல் இன்று வரை மாவட்ட ஆட்சியர்கள், துறை அமைச்சர்கள், அதிகாரிகள், எம்.பி.க்கள் அனைவரிடமும் மனு கொடுத்துவிட்டனர். இதுவரை இவர்களுக்கு தீர்வு கிடைக்கவில்லை. கடந்த மார்ச் 19 முதல் இன்று வரை 29 நாட்களாக வேலை நிறுத்தம் செய்து வருகின்றனர்.

 கோவை மாவட்டம், சோமனூரில் விசைத்தறி உரிமையாளர் சங்கங்களின் கூட்டமைப்பு நிர்வாகிகள் 12 பேர் கடந்த 6 நாட்களாக உண்ணாவிரதம் இருந்து வருகின்றனர். இவர்களுக்கு ஆதரவாக தினமும் சுமார் 2 ஆயிரத்துக்கும் மேற்பட்ட விசைத்தறி உரிமையாளர்கள் தொடர் உண்ணாவிரதம் இருந்து வருகின்றனர். எனவே இந்த அரசு உடனடியாக கூலிக்கு நெசவு செய்யும் விசைத்தறி உரிமையாளர் சங்கங்களின் கூட்டமைப்புடன் பேச்சு வார்த்தை நடத்தி தீர்வுகாண வேண்டும்” என்று பேசினார்.

அதற்கு அமைச்சர் தங்கம் தென்னரசு பதிலளித்து பேசும்போது “அரசும் நிலைமையின் தீவிரத்தை முழுமையாக உணர்ந்திருக்கிறது. அமைச்சர்களும், மாவட்ட ஆட்சியர்களும் தொடர்ந்து பேச்சுவார்த்தையில் ஈடுபட்டுள்ளனர். முதல்வர் இப்பிரச்சினையை தீர்க்க வேண்டும் என்பதில் உறுதியாக உள்ளார். இவ்விவகாரத்தில் அரசு முழு கவனத்தோடு உள்ளது. இப்பிரச்சினையை உடனடியாக தீர்ப்பதற்கான எல்லா நடவடிக்கைகளையும் அரசு எடுத்து வருகிறது” என்று கூறினார்.