ரூ. 100 கோடியில் சென்னை தரமணி மைய தொழில்நுட்ப வளாகம் மேம்படுத்தப்படும்: அமைச்சர் கோவி.செழியன் அறிவிப்பு

சென்னை, சென்னை தரமணி மைய தொழில்நுட்ப வளாகம் ரூ.100 கோடியில் மேம்படுத்தப்படும் என்று அமைச்சர் கோவி.செழியன் அறிவித்துள்ளார். 

தமிழக சட்டப்பேரவையில் உயர் கல்வித் துறை அமைச்சர் கோவி.செழியன் தனது துறை சார்ந்த புதிய அறிவிப்புகளை வெளியிட்டு பேசியதாவது:-

 அரசு  கல்லூரிகளில் முன்னாள் மாணாக்கர்கள் சங்கம் தலா ரூ.2 லட்சம் மதிப்பீட்டில் ஏற்படுத்தப்படும்.  

அந்தியூர் மற்றும் அரவக்குறிச்சி ஆகிய 2 அரசு கலை மற்றும் அறிவியல் கல்லூரிகளுக்கு தலா ரூ.17.50 கோடி மதிப்பீட்டில் கட்டிடங்கள் கட்டப்படும்.

சென்னை, பெரியார் அறிவியல் தொழில்நுட்ப மையத்திற்கு "புதிய நடமாடும் அறிவியல் கண்காட்சிப் பேருந்து" ரூ.80 லட்சம் மதிப்பீட்டில் வாங்கப்படும்.

தமிழ்நாட்டில் உள்ள அனைத்து அரசு பொறியியல் கல்லூரிகள் மற்றும் அரசு பலவகை தொழில்நுட்பக் கல்லூரிகளில் அருகலை வசதி ஏற்படுத்தப்படும். அரசு கலை மற்றும் அறிவியல் கல்லூரிகளில் புதிதாகக் கட்டப்பட்ட வகுப்பறைகளுக்குத் தேவையான தளவாடங்கள் ரூ.5 கோடி மதிப்பீட்டில் கொள்முதல் செய்யப்படும்.

சுற்றுச்சுவர் இல்லாத அரசு கலை மற்றும் அறிவியல் கல்லூரிகளில் சங்கிலி இணைப்பு வேலி ரூ.5.02 கோடி மதிப்பீட்டில் அமைக்கப்படும். அரசு கலை மற்றும் அறிவியல் கல்லூரிகளில் ஊடாடும் திறன் பலகைகள் ரூ.4.35 கோடி மதிப்பீட்டில் நிறுவப்படும்.

அரசுக் கல்லூரி ஆசிரியர்களுக்கு முறையான பயிற்சி வழங்கப்படும். இதற்காக, கல்லூரி ஆசிரியர் மாநில பயிற்சி மையம் அமைக்கப்படும். அரசு கலை, அறிவியல் மற்றும் கல்வியியல் கல்லூரி ஆசிரியர்களுக்குத் திறன் மேம்பாட்டுப் பயிற்சி வழங்கப்படும். அரசு கலை, அறிவியல், கல்வியியல் மற்றும் பொறியியல் கல்லூரி முதல்வர்களுக்கு நிர்வாகப் பயிற்சி வழங்கப்படும்.

அரசு கலை மற்றும் அறிவியல் கல்லூரி மாணாக்கர்களுக்கான உள்ளிடைப் பயிற்சி, வேலைவாய்ப்பு வழிகாட்டி மற்றும் வேலைவாய்ப்பு மையம் மேம்படுத்தப்படும். முனைவர் பட்ட ஆராய்ச்சி மாணாக்கர்களுக்கான வலை முகப்பு ரூ.60 லட்சம் மதிப்பீட்டில் உருவாக்கப்படும். சென்னை, தரமணி, மைய தொழில்நுட்ப வளாகம் ரூ.100 கோடி மதிப்பீட்டில் மேம்படுத்தப்படும்.

இவ்வாறு அவர் பேசினார்.