ஒடிசா சட்டசபையில் அமளி

புவனேஸ்வர், ஒடிசா சட்டசபையில் எதிர்க்கட்சியினர் கடும் அமளியால் அவை ஒத்திவைக்கப்பட்டது.

ஒடிசா மாநில சட்டசபையின் குளிர்கால கூட்டத்தொடர் நேற்று தொடங்கி டிசம்பர் 31-ந்தேதி வரை நடைபெற உள்ளது. ஒடிசாவின் முதல்வரும், நிதித்துறை மந்திரியுமான மோகன் சரண் மாஜி நேற்று சட்டசபையில் பட்ஜெட்டை தாக்கல் செய்தார். முன்னதாக நேற்று கூட்டத்தொடர் தொடங்கிய பின்னர், மறைந்த 6 முன்னாள் எம்.எல்.ஏ.க்களுக்கு மவுன அஞ்சலி செலுத்தப்பட்டது.

இதனை தொடர்ந்து அவை நடவடிக்கைகள் தொடங்கியபோது, ஒடிசாவின் கந்தமால் மாவட்டத்தில் உள்ள மண்டிபங்கா கிராமத்தில், உணவு தட்டுப்பாடு காரணமாக மாம்பழ விதையில் இருந்து எடுக்கப்படும் கூழை சாப்பிட்டு 3 பழங்குடியின பெண்கள் உயிரிழந்த விவகாரம் தொடர்பாக எதிர்க்கட்சியினர் கேள்வி எழுப்பினர். மாநில பா.ஜ.க. அரசு பொது உணவு விநியோக திட்டத்தை முறையாக செயல்படுத்தவில்லை என்று கூறி எதிர்க்கட்சி பி.ஜே.டி. மற்றும் காங்கிரஸ் எம்.எல்.ஏ.க்கள் கோஷமிட்டனர். இது தொடர்பாக முதல்வர் மோகன் சரண் மாஜி தலைமையிலான அரசுக்கு கண்டனம் தெரிவித்து எதிர்க்கட்சி எம்.எல்.ஏ.க்கள் அமளியில் ஈடுபட்டனர். இதனால் சட்டசபை கூட்டத்தொடர் முதல் நாளிலேயே ஒருமணி நேரம் ஒத்திவைக்கப்பட்டது.