தொகுதி மறுவரையறை ஆலோசனை கூட்டம்: பவன் கல்யாணின் ஜனசேனா கட்சி பங்கேற்பு

சென்னை, சென்னையில் இன்று நடைபெறும் தொகுதி மறுவரையறை கூட்டத்தில் ஜனசேனை கட்சி பங்கேற்க உள்ளதாக தகவல் வெளியாகியுள்ளது.

தொகுதி மறுவரையறை கூட்டு நடவடிக்கைக் குழு கூட்டம் சென்னையில் சனிக்கிழமை(மார்ச் 22-ஆம் தேதி) முதல்வர் மு.க.ஸ்டாலின் தலைமையில் நடைபெறவுள்ளது. இக்கூட்டத்தில் பங்கேற்க வருமாறு பல்வேறு மாநிலங்களின் முதல்வர்களுக்கு மு.க.ஸ்டாலின் கடிதம் எழுதியுள்ளார்.

அவர்களுக்கு திமுக அமைச்சர்கள், எம்.பி.க்கள் உள்ளிட்டோர் அடங்கிய பிரதிநிதிகள் குழு நேரில் சென்று அழைப்பு விடுத்து வருகிறது. கடந்த மார்ச் 13-ஆம் தேதி தமிழக நகராட்சி நிர்வாகத் துறை அமைச்சர் கே.என். நேரு தலைமையிலான குழு தில்லியில் தெலங்கான முதல்வர் ரேவந்த் ரெட்டியைச் சந்தித்து அழைப்பு விடுத்திருந்தது.

இந்த நிலையில் சென்னையில் இன்று நடைபெறும் தொகுதி மறுவரையறை கூட்டத்தில் பவன் கல்யாணின் ஜனசேனா கட்சி பங்கேற்க உள்ளதாக தகவல் வெளியாகியுள்ளது. ஜனசேனை கட்சியின் மக்களவை உறுப்பினர் உதய் சீனிவாஸ் கட்சி சார்பில் கூட்டத்தில் கலந்துகொள்கிறார் எனக் கூறப்படுகிறது.

ஜனசேனை கட்சி பங்கேற்கும் நிலையில் தெலுங்கு தேசம் கட்சி இந்த கூட்டத்தை புறக்கணித்துள்ளது. ஆந்திரத்தில் பாஜக கூட்டணியில் உள்ள ஜனசேனை கட்சி தொகுதி மறுவரையறை கூட்டத்தில் பங்கேற்கவிருப்பதாக வெளியான தகவல் அரசியல் பார்வையாளர்கள் மத்தியில் கவனம் பெற்றுள்ளது.