மத்திய அரசு ஊழியர்களுக்கு 7 சதவீத அகவிலைப்படி உயர்வு

சென்னை, பிப்.- 2 - மத்திய அரசு ஊழியர்களுக்கு வழங்கப்படும் அகவிலை படியை 7 சதவீதம் உயர்த்த மத்திய அரசு முடிவு செய்துள்ளது. ஆண்டுக்கு இரண்டுமுறை அகவிலைப்படி உயர்த்தப்படுவது வழக்கம். ஜனவரி மற்றும் ஜூலை மாதத்தை மையமாக வைத்து இந்த அகவிலைப்படி வழங்கப்படுகிறது. 2012 ஜனவரிக்கான அகவிலைப்படி உயர்த்துவது குறித்து மத்திய அரசு ஆலோசனை செய்தது. தற்போதைய விலைவாசி உயர்வை கருத்தில்கொண்டு 7 சதவீதம் அகவிலைப்படியை உயர்த்த மத்திய அரசு முடிவு செய்துள்ளது. அமைச்சரவை ஒப்புதலுக்காக அனுப்பப்பட்டுள்ள இந்த அறிவிப்பு விரைவில் வெளியாகும் என்று எதிர்பார்க்கப்படுகிறது. ஏற்கனவே 58 சதவீதம் அகவிலைப்படி பெற்றுவரும் மத்திய அரசு ஊழியர்கள் தற்போது உயரும் 7 சதவீதத்துடன் 65 சதவீத அகவிலைப்படி உயர்வை பெறுவார்கள். 2006 ம் ஆண்டு 6 வது ஊதியக் குழு பரிந்துரைத்த ஊதிய உயர்வுக்கு பிறகு அகவிலைப்படி இதுவரை 11 முறை உயர்த்தப்பட்டுள்ளது.