துணை முதல்வர் பதவி குறித்து முதல்வர்தான் முடிவெடுப்பார் : அமைச்சர் உதயநிதி ஸ்டாலின் பேட்டி

சென்னை : துணை முதல்வர் பதவி குறித்து எந்த முடிவாக இருந்தாலும் முதல்வர்தான் எடுப்பார். முழுக்க முழுக்க அது முதல்வரின் முடிவுதான் என்று அமைச்சர் உதயநிதி ஸ்டாலின்  தெரிவித்தார். 

தி.மு.க. தொடங்கி 75 ஆண்டுகள் நிறைவு பெற்றதையொட்டி பவள விழாவும், ஆண்டுதோறும் கொண்டாடப்படும் முப்பெரும் விழாவும் சென்னை நந்தனம் ஒய்.எம்.சி.ஏ. மைதானத்தில் நேற்று முன்தினம் நடைபெற்றது.   இதனையடுத்து வரும் 28-ம் தேதி காஞ்சிபுரத்தில் தி.மு.க. பவள விழா பொதுக் கூட்டம் நடைபெற உள்ளது. 

இந்நிலையில் இந்த கூட்டம் தொடர்பாக தி.மு.க. தலைமையகமான அண்ணா அறிவாலயத்தில்  முதல்வர் மு.க.ஸ்டாலின் அக்கட்சியின் மூத்த தலைவர்களுடன் ஆலோசனை மேற்கொண்டார்.  

இந்த ஆலோசனைக்கு பின்னர் அமைச்சர் உதயநிதி ஸ்டாலின் செய்தியாளர்களை சந்தித்தார். அப்போது அவர் கூறியதாவது, 

துணை முதல்வர் பதவி குறித்து எந்த முடிவாக இருந்தாலும் முதல்வர்தான் எடுப்பார். முழுக்க முழுக்க அது முதல்வரின் முடிவு தான்.  என்னை துணை முதல்வராக்க வேண்டும் என தொண்டர்கள் சொல்வது அவர்களின் விருப்பம். 

தொண்டர்களின் விருப்பத்தை  தெரிவிக்கும் வகையில் எஸ்.எஸ்.பழனிமாணிக்கம் பேசியிருந்தார். எல்லா அமைச்சர்களுமே முதல்வருக்கு துணையாகதான் இருக்கிறோம். தமிழகத்தில் பெரியாரை தொடாமல் யாரும் அரசியல் செய்ய முடியாது. இவ்வாறு அவர் தெரிவித்தார்.