ட்ராமா - விமர்சனம்

திருமணம் ஆகி பல ஆண்டுகளுக்கு பிறகு கர்ப்பமாகும் சாந்தினிக்கு, ஒரு மர்ம போன் வருகிறது. தன் வயிற்றில் வளரும் குழந்தைக்கு அப்பா தனது கணவர் விவேக் பிரசன்னா இல்லை என்று சொல்லும் அந்த மர்ம நபர் அதே நம்பரிலிருந்து வீடியோ ஒன்றையும்  அனுப்புகிறார். இது ஒரு கதை. இன்னொரு கதை. காதலனால் கர்ப்பமடையும் பூர்ணிமா ரவி தன் காதலனின் உண்மையான முகத்தை தெரிந்து கொண்டு அவருடன் வாழவே கூடாது, என்ற முடிவுக்கு வருகிறார். இந்த இரண்டு கதைகளிலும் பாதிப்புக்கு உள்ளான பெண்கள் அதில் இருந்து மீண்டார்களா?, இதன் பின்னணியில் இருப்பவர் யார்? என்ற முடிச்சை அவிழ்க்கும் படைப்புதான் ட்ராமா. கதையின் நாயகனாக நடித்திருக்கும் விவேக் பிரசன்னா, எதார்த்தமான நடிப்பை வழக்கம் போல வழங்கி இருக்கிறார். நாயகியாக நடித்திருக்கும் சாந்தினி, பல இடங்களில் அழுத்தமான நடிப்பைக் கொடுத்திருக்கிறார். இளம் நாயகனாக வரும் பிரதோஷ், அவரது காதலி பூர்ணிமா ரவி இருவரும் தங்களது கதாபாத்திரத்திற்கு நியாயம் சேர்க்கும் வகையில் நடித்திருக்கிறார்கள். ஆனந்த் நாக், சஞ்ஜீவ், பிரதீப் கே.விஜயன், என பலரும் திரைக்கதை ஓட்டத்திற்கு பயன்பட்டிருக்கிறார்கள். ஆர்.எஸ்.ராஜ்பிரதாப் இசையும், அஜித் ஸ்ரீனிவாசனின் ஒளிப்பதிவும் படத்துக்கு கூடுதல் பலம் சேர்த்துள்ளது. எழுதி இயக்கியிருக்கும் தம்பிதுரை மாரியப்பன், மருத்துவ பின்னணியில் நடக்கும் குற்ற செயல்களை தோலுறித்துக் காட்டியதுடன், காட்சிக்கு காட்சி எதிர்பாராத திருப்பங்களைக் கொடுத்து பார்வையாளர்களை படத்துடன் ஒன்ற வைத்துள்ளார். மொத்தத்தில், ட்ராமாவை ஒரு முறை தாராளமாக பார்க்கலாம்.