ஐ.பி.எல். மெகா ஏலம் 2-வது நாள்: சாம் கர்ரண் ரூ.2.40 கோடி ஏலம்; குருனால் ரூ.5.75 கோடிக்கு ஏலம்

ஜெட்டா : ஐ.பி.எல். தொடரின் 2-ம் நாள் மெகா ஏலம் நேற்று தொடங்கி நடைபெற்றது. இதில் சாம் கர்ரணை ரூ.2.40 கோடி ஏலம் எடுத்துள்ளது சென்னை சூப்பர் கிங்ஸ் அணி. குருனால் பாண்ட்யாவை ரூ.5.75 கோடிக்கு பெங்களூரு அணி ஏலம் எடுத்தது.

ஜெட்டா நகரில்... 

ஐ.பி.எல். கிரிக்கெட் வீரர்களின் 2 நாள் ஏலம் சவுதி அரேபியாவின் ஜெட்டா நகரில் நேற்று முன்தினம் தொடங்கியது. 7 மணி நேரம் நடந்த முதல் நாள் ஏலத்தில் 24 வெளிநாட்டவர் உள்பட 72 வீரர்கள் மொத்தம் ரூ.467.95 கோடிக்கு விற்கப்பட்டனர். இதில் 20 வீரர்கள் ரூ.10 கோடிக்கு மேல் விலை போனது வியப்பூட்டியது. ரிஷப் பண்ட் (ரூ.27 கோடி, லக்னோ), ஸ்ரேயாஸ் அய்யர் (ரூ.26¾ கோடி, பஞ்சாப்) ஆகியோர் புதிய உச்சத்தை தொட்டனர்.

ரோவ்மன் பவல்... 

இந்நிலையில் 2-வது நாள் மெகா ஏலம் நேற்று தொடங்கியது. இதில் முதல் வீரராக ரோவ்மன் பவலை கொல்கத்தா அணி ரூ. 1.50 கோடிக்கு ஏலத்தில் எடுத்துள்ளது. இந்திய இளம் வீரரான பிரித்வி ஷாவை எந்த அணியும் ஏலத்தில் எடுக்க ஆர்வம் காட்டவில்லை. பஞ்சாப் கிங்ஸ் அணியின் முன்னள் கேப்டனான சாம் கர்ரணை சென்னை சூப்பர் கிங்ஸ் ரூ. 2.40 கோடிக்கு வாங்கியுள்ளது. வெஸ்ட் இண்டீஸ் அணியின் கேப்டனான ஷாய் ஹோப் மற்றும் இந்திய விக்கெட் கீப்பரான கே.எஸ். பாரத் இருவரையும் எந்த அணியும் ஏலம் எடுக்கவில்லை. 

குருனால் பாண்ட்யா...

ஆல் ரவுண்டரான நிதிஷ் ராணாவை ராஜஸ்தான் ராயல்ஸ் அணி ரூ. 4.2 கோடிக்கு வாங்கியுள்ளது. இந்திய ஆல் ரவுண்டரான குருனால் பாண்ட்யாவை ஏலத்தில் எடுக்க பெங்களூரு - ராஜஸ்தான் அணிகளுக்கு இடையே கடும் போட்டி நிலவியது. இறுதியில் பெங்களூரு அணி ரூ. 5.75 கோடிக்கு வாங்கியது. சென்னை அணியின் முன்னாள் வீரரான டேரில் மிட்செலை எந்த அணியும் ஏலத்தில் எடுக்கவில்லை. தென் ஆப்பிரிக்க அணியின் முன்னணி வீரரான மார்கோ ஜான்சனை ஏலத்தில் எடுக்க பஞ்சாப் மற்றும் குஜராத் அணிகள் போட்டியிட்டன. முடிவில் பஞ்சாப் ரூ. 7 கோடிக்கு அவரை வாங்கியது.

வாஷிங்டன் சுந்தர்... 

தமிழக வீரரான வாஷிங்டன் சுந்தரை ரூ. 3.20 கோடிக்கு குஜராத் டைட்டன்ஸ் வாங்கியுள்ளது.  பெங்களூரு அணியின் முன்னாள் கேப்டனான பாப் டு பிளெஸ்சிஸை ரூ.2 கோடிக்கு டெல்லி கேப்பிட்டல்ஸ் வாங்கியுள்ளது.  முன்னணி வீரர்களான வில்லியம்சன், கிளென் பிலிப்ஸ், ரகானே, மயங்க் அகர்வால், ஷர்துல் தாகூர் ஆகியோரை எந்த அணியும் ஏலம் எடுக்கவில்லை.