ஒரே நாடு ஒரே தேர்தல் சட்ட விதிகள் என்ன? பாராளுமன்ற கூட்டுக்குழு முதல் கூட்டத்தில் அதிகாரிகள் விளக்கம்

புதுடெல்லி: ‘ஒரே நாடு ஒரே தேர்தல்’ மசோதாக்களை பரிசீலிக்க அமைக்கப்பட்ட பாராளுமன்ற கூட்டுக் குழுவின் முதல் கூட்டம் நேற்று தொடங்கிய நிலையில் ஒரே நாடு ஒரே தேர்தல் சட்ட விதிகள் என்ன? என்பது குறித்து அதிகாரிகள் குழுவுக்கு விளக்கமளித்தனர்.

மக்களவை, மாநிலங்கள் மற்றும் யூனியன் பிரதேசங்களின் பேரவைகளுக்கு ஒரே நேரத்தில் தேர்தல் நடத்தும் நடைமுறையை அமல்படுத்த மத்திய பாஜக அரசு திட்டமிட்டுள்ளது. இதற்காக 2 மசோதாக்களை அண்மையில் நடைபெற்ற குளிர்கால கூட்டத்தொடரின்போது மக்களவையில் மத்திய அரசு தாக்கல் செய்தது. இந்த மசோதாக்களுக்கு எதிர்க்கட்சிகள் கடும் ஆட்சேபம் தெரிவித்ததால், அவற்றை பாராளுமன்ற கூட்டுக் குழு பரிசீலனைக்கு அனுப்ப முடிவு செய்யப்பட்டது.

இதைத்தொடர்ந்து பாஜக மக்களவை உறுப்பினர் பி.பி. செளதரி தலைமையில் 39 பேர் கொண்ட கூட்டுக் குழு அமைக்கப்பட்டது. இந்தக் குழுவில் 27 மக்களவை எம்.பி.க்கள், 12 மாநிலங்களவை எம்.பி.க்கள் இடம்பெற்றுள்ளனர். இந்தக் குழுவின் முதல் கூட்டம் டெல்லியில் பாராளுமன்ற வளாகத்தில் நேற்று காலை கூடியது. கூட்டுக்குழுவின் தலைவர் பி.பி. செளதரி, காங்கிரஸ் எம்.பி. பிரியங்கா காந்தி உள்ளிட்டோர் கலந்து கொண்டனர். மசோதாக்களில் இடம்பெற்றுள்ள விவரம் குறித்து மத்திய சட்டம் மற்றும் நீதி அமைச்சக அதிகாரிகள் குழுவிடம் விளக்கமளித்தனர்.