இஸ்ரோ பணி கூட்டுப்பணி: புதிய தலைவர் நாராயணன்

சென்னை: இஸ்ரோ பணி என்பது தனிப்பட்ட பணி அல்ல, அனைவருடைய கூட்டுப் பணி என இஸ்ரோ தலைவராக நியமிக்கப்பட்டுள்ள வி.நாராயணன் தெரிவித்தார். 

இந்திய விண்வெளி ஆராய்ச்சி நிறுவனத்தின் 11-வது தலைவராக தமிழகத்தை சேர்ந்த வி.நாராயணன் நியமிக்கப்பட்டுள்ளார். தற்போதைய இஸ்ரோ தலைவர் எஸ்.சோம்நாத்துக்குப் பிறகு இஸ்ரோவின் அடுத்த தலைவராக டாக்டர் வி. நாராயணன் வருகிற 14-ம் தேதி பொறுப்பேற்கிறார். 

இதுகுறித்து அவர் வெளியிட்டுள்ள அறிக்கையில் கூறியிருப்பதாவது:- மிக முக்கியமான பொறுப்பை பிரதமர் நரேந்திர மோடி கொடுத்திருக்கிறார். அதனை மிக மிக முக்கியமான பொறுப்பு என நான் நினைக்கிறேன். இஸ்ரோவிற்கு அடுத்தடுத்து முக்கியமான சில திட்டங்கள் உள்ளன. இஸ்ரோ பணி என்பது தனிப்பட்ட பணி அல்ல, அனைவருடைய கூட்டுப் பணி என கூறினார். ராக்கெட் மற்றும் விண்கல திரவ உந்துவிசையில் நிபுணத்துவம் பெற்றவரான வி. நாராயணன், 1984 இல் இஸ்ரோவில் சேர்ந்து நிறுவனத்திற்குள் பல முக்கிய பதவிகளை வகித்துள்ளார்.

ஆரம்ப கட்டத்தில், விக்ரம் சாராபாய் விண்வெளி மையத்தில் ஒலி ராக்கெட்டுகளுக்கான திட உந்துவிசை பகுதி, ஆக்மென்டட் செயற்கைக்கோள் ஏவுதள வாகனங்கள் மற்றும் துருவ செயற்கைக்கோள் ஏவுதளம் வாகனங்கள் ஆகியவற்றின் திட உந்துவிசை பகுதியில் பணியாற்றினார். இஸ்ரோவின் பி.எஸ்.எல்.வி. சி.57, சூரியன் ஆய்வுக்கான ஆதித்யா எல்1 திட்டம், ஜிஎஸ்எல்வி மாக்-3 வகை ஏவுகணைக்கான சி.இ.20 கிரையோஜெனிக் என்ஜின் தயாரிப்பு, சந்திரயான் 2 மற்றும் 3 உள்ளிட்ட பல திட்டங்களில் குறிப்பிடத்தக்க பங்களிப்பை அளித்துள்ளார். 

வி.நாராயணனின் பணிக்கு ஐ.ஐ.டி. கரக்பூரின் வெள்ளிப் பதக்கம், இந்திய விண்வெளி சங்கம் தங்கப் பதக்கம் மற்றும் ராக்கெட் மற்றும் தொடர்புடைய தொழில்நுட்பங்களுக்கான ஏ.எஸ்.ஐ. விருது, இந்திய உயர் ஆற்றல் பொருள்கள் சங்கத்தின் குழு விருது, தேசிய பேரிடர் மீட்புப் படையின் தேசிய வடிவமைப்பு விருது, சிறந்த சாதனை மற்றும் செயல்திறன் சிறப்பு விருதுகள் மற்றும் இஸ்ரோவின் குழு சிறப்பு விருதுகள், தேசிய பேரிடர் மீட்புப் படையின்  தேசிய வடிவமைப்பு விருது உள்ளிட்ட ஏராளமான பாராட்டுகளை பெற்றுள்ளார்.