சற்று குறைந்த தங்கம் விலை

சென்னை: தங்கம் விலை சவரனுக்கு ரூ.320 நேற்று முன்தினம் அதிகரித்த நிலையில் நேற்று சற்று குறைந்தது.

தங்கம் விலை இந்த மாதம் தொடக்கத்தில் இருந்து ஏற்ற, இறக்கத்துடன் காணப்பட்ட நிலையில், கடந்த 16-ந் தேதி ஒரு சவரன் ரூ.57 ஆயிரத்தை கடந்து புதிய உச்சத்தை பதிவு செய்தது. அதன் பின்னரும், தங்கம் விலை தொடர்ந்து ஏறுமுகத்திலேயே பயணித்து வருகிறது. இதனால் 2 நாள் இடைவெளியிலேயே அதாவது, கடந்த 19-ந் தேதி ஒரு சவரன் ரூ.58 ஆயிரம் என்ற நிலையையும் தாண்டியது. அதனைத் தொடர்ந்தும் தங்கம் விலை உயர்ந்து வருவதை பார்க்க முடிகிறது.

அந்த வகையில் நேற்று முன்தினம் தங்கம் விலை சவரனுக்கு ரூ.320 உயர்ந்து ரூ.58,720-க்கு விற்பனையானது. இதன் மூலம் தங்கம் விலை மீண்டும் வரலாறு காணாத புதிய உச்சத்தை எட்டியது. இந்த நிலையில் நேற்று தங்கம் விலை அதிரடியாக குறைந்து சற்று ஆறுதல் அளித்துள்ளது. அதன்படி, சென்னையில் 22 கேரட் ஆபரணத் தங்கத்தின் விலை நேற்று சவரனுக்கு ரூ.440 குறைந்து ரூ.58,280-க்கு விற்பனையானது. கிராமுக்கு ரூ.55 குறைந்து ரூ.7,285-க்கு விற்பனையானது. தங்கம் விலையை போல, வெள்ளி விலையும் உயர்ந்து வந்தது. இந்த நிலையில் நேற்று வெள்ளி விலை கிராமுக்கு ரூ.2 குறைந்து ரூ.110-க்கு விற்பனையானது.