மார்க்சிஸ்ட் கம்யூ. கட்சியின் மாநில செயலாளராக பெ.சண்முகம் தேர்வு

விழுப்புரம் : மார்க்சிஸ்ட் கம்யூனிஸ்ட் கட்சியின் மாநிலச் செயலாளராக பெ. சண்முகம் தேர்வு செய்யப்பட்டுள்ளார்.

விழுப்புரத்திலுள்ள தனியார் திருமண மண்டபத்தில் மார்க்சிஸ்ட் கம்யூனிஸ்ட் கட்சியின் 24-ஆவது மாநில மாநாடு ஜன. 3 ஆம் தேதி தொடங்கியது. இந்த மாநாட்டை அரசியல் தலைமைக் குழு உறுப்பினர் பேபி தொடங்கி வைத்தார். கட்சியின் அரசியல் தலைமைக்குழு ஒருங்கிணைப்பாளர் பிரகாஷ் காரத், தலைமைக் குழு உறுப்பினர்கள் பிருந்தாகாரத், ஜி.ராமகிருஷ்ணன், இந்திய கம்யூனிஸ்ட் கட்சியின் மாநிலச் செயலர் ஆர். முத்தரசன் உள்ளிட்டோர் பங்கேற்றனர்.

மாநாட்டின் நிறைவு நாளான நேற்று புதிய மாநிலக்குழு, மாநிலக் கட்டுப்பாட்டுக் குழுவினரும், அகில இந்திய மாநாட்டுப் பிரதிநிதிகளும் தேர்ந்தெடுக்கப்பட்டனர். இதைத் தொடர்ந்து மாநிலக் குழுவினர் கூடி புதிய மாநிலச் செயலரைத் தேர்ந்தெடுத்தனர். அதன்படி மாநிலச் செயலராக பெ. சண்முகம் தேர்ந்தெடுக்கப்பட்டார். 

மாநாட்டுத் தொகுப்புரையை மாநிலச் செயலர் கே.பாலகிருஷ்ணன் வழங்கினார். அரசியல் தலைமைக் குழு ஒருங்கிணைப்பாளர் பிரகாஷ்காரத் நிறைவுரை வழங்கினார். இதைத் தொடர்ந்து புதிய மாநிலச் செயலர் பெ .சண்முகம் நிறைவுரையாற்றினார். புதிய மாநில செயலாளராக தேர்வாகியுள்ள சண்முகம் மலைவாழ் மக்கள் சங்கத்தின் தலைவராக பதவி வகித்தவர். மார்க்சிஸ்ட் கம்யூனிஸ்ட் கட்சியில் இளைஞர் அமைப்பு மற்றும் விவசாய சங்க மாநிலச் செயலாளராக இருந்தவர். வாச்சாத்தி வன்கொடுமை வழக்கை இறுதிவரை நடத்தியவர் என்பது குறிப்பிடத்தக்கது.

மார்க்சிஸ்ட் கம்யூனிஸ்ட் கட்சியின் தமிழ்நாடு மாநில செயலாளர் கே.பாலகிருஷ்ணன், கட்சி பொறுப்புகளில் இருந்து தன்னை விடுவிக்க வேண்டும் கோரிக்கை விடுத்துள்ளார். மார்க்சிஸ்ட் கம்யூனிஸ்ட் கட்சியின் அமைப்பு சட்ட விதிகளின்படி 72 வயதுக்கு மேல் ஒருவர் எந்தவிதமான பொறுப்புகளிலும் நீடிக்க முடியாது. கே.பாலகிருஷ்ணனுக்கு அடுத்த மாதம் 72 வயது ஆக உள்ளதால், தன்னை கட்சி பொறுப்புகளில் இருந்து விடுவிக்க வேண்டும் என்று அவர் கோரிக்கை விடுத்திருந்தார்.