இலங்கையை வீழ்த்தியது நியூசிலாந்து

இலங்கை கிரிக்கெட் அணி நியூசிலாந்தில் சுற்றுப்பயணம் மேற்கொண்டு 3 டி20 மற்றும் 3 ஒருநாள் போட்டிகள் கொண்ட தொடரில் ஆட உள்ளது. இதில் முதலில் டி20 தொடர் நடைபெறுகிறது. இந்நிலையில், இரு அணிகளுக்கும் இடையிலான முதல் டி20 போட்டி மவுண்ட் மவுங்கானுயில் நேற்று நடைபெற்றது. இதில் டாஸ் வென்ற இலங்கை பந்துவீச்சை தேர்வு செய்தது. அதன்படி முதலில் பேட்டிங் செய்த நியூசிலாந்து 20 ஓவர்கள் முடிவில் 8 விக்கெட்டுகளை இழந்து 172 ரன்கள் அடித்தது. 

இதனையடுத்து 173 ரன்கள் அடித்தால் வெற்றி என்ற இலக்கை நோக்கி களமிறங்கிய இலங்கை அணிக்கு தொடக்க ஆட்டக்காரகள் ஆன நிசங்கா மற்றும் குசல் மெண்டிஸ் வலுவான அடித்தளம் அமைத்து கொடுத்தனர். முடிவில் இலங்கை 20 ஓவர்களில் 8 விக்கெட்டுகளை இழந்து 164 ரன்கள் மட்டுமே அடித்தது. இதன் மூலம் 8 ரன்கள் வித்தியாசத்தில் வெற்றி பெற்ற நியூசிலாந்து தொடரில் 1-0 என்ற கணக்கில் முன்னிலை பெற்றுள்ளது. நியூசிலாந்தின் வெற்றிக்கு முக்கிய பங்காற்றிய ஜேக்கப் டபி ஆட்டநாயகனாக தேர்வு செய்யப்பட்டார். 

__________________________________________________________________________________________________

முன்னணி வீராங்கனை விலகல்

2025-ம் ஆண்டின் முதல் கிராண்ட்ஸ்லாம் போட்டியான ஆஸ்திரேலிய ஓபன் டென்னிஸ் தொடர் அடுத்த மாதம் (ஜனவரி) 12-ம் தேதி தொடங்கி 26-ம் தேதி வரை நடைபெற உள்ளது. இதற்கான தகுதி சுற்று ஜனவரி 6 முதல் 9-ம் தேதி வரை நடைபெற உள்ளது. இந்நிலையில் இந்த தொடரிலிருந்து 2 'கிராண்ட்ஸ்லாம்' பட்டம் வென்றவரும், முன்னாள் 'நம்பர் 1' வீராங்கனையுமான ருமேனியாவின் சிமோனா ஹாலெப் விலகுவதாக அறிவித்துள்ளார். கால்முட்டி மற்றும் தோள்பட்டை வலியால் அவதிப்படும் அவர் அதில் இருந்து முழுமையாக மீளாததால் இந்த முடிவை எடுத்துள்ளார்.

__________________________________________________________________________________________________

தமிழகம் 353 ரன்கள் குவிப்பு

32-வது விஜய் ஹசாரே கோப்பைக்கான ஒரு நாள் கிரிக்கெட் தொடர் இந்தியாவின் பல்வேறு நகரங்களில் நடந்து வருகிறது. விஜயநகரத்தில் நேற்று நடைபெற்று வரும் லீக் ஆட்டம் ஒன்றில் தமிழகம் - ஜம்மு காஷ்மீர் அணிகள் ஆடி வருகின்றன. இந்த ஆட்டத்திற்கான டாசில் வென்ற ஜம்மு காஷ்மீர் முதலில் பந்துவீசுவதாக அறிவித்தது. தொடர்ந்து தமிழகத்தின் தொடக்க ஆட்டக்காரர்களாக துஷார் ரஹேஜா மற்றும் ஜெகதீசன் களம் இறங்கினர். 

இதில் துஷார் ரஹேஜா 7 ரன்னிலும், அடுத்து வந்த பிரதோஷ் ரஞ்சன் பால் 7 ரன்னிலும் அவுட் ஆகினர். தொடர்ந்து பாபா இந்திரஜித் களம் இறங்கினர். ஜெகதீசன் - இந்திரஜித் இணை நிதானமாக ஆடி ரன்கள் சேர்த்தது. இருவரும் அரைசதம் அடித்து அசத்தினர். இதில் இந்திரஜித் 78 ரன்னில் அவுட் ஆனார். அடுத்து வந்த விஜய் சங்கர் 25 ரன், முகமது அலி 37 ரன் எடுத்து அவுட் ஆகினர். மறுமுனையில் அதிரடியாக ஆடிய ஜெகதீசன் சதம் அடித்த நிலையில் 165 ரன்னில் அவுட் ஆனார். இறுதியில் தமிழகம் 50 ஓவர்களில் 6 விக்கெட்டை இழந்து 353 ரன்கள் குவித்துள்ளது. இதையடுத்து 354 ரன் எடுத்தால் வெற்றி என்ற இலக்குடன் ஜம்மு காஷ்மீர் ஆட உள்ளது.

__________________________________________________________________________________________________

ரிஷப் பண்ட் மீது விமர்சனம்

ஆஸ்திரேலியாவுக்கு எதிரான 4-வது டெஸ்ட் போட்டியின் முதல் இன்னிங்சில் ரிஷப் பண்ட் அவுட் ஆன விதம் குறித்து முன்னாள் வீரர் சுனில் கவாஸ்கர் தனது அதிருப்தியை வர்ணனையின் போது வெளிப்படுத்தி உள்ளார். இது தொடர்பாக அவர் கூறியதாவது, முட்டாள், முட்டாள், முட்டாள். உனக்காகவே அங்கு 2 பீல்டிங் வைத்திருக்கும்போதும் நீ அந்த ஷாட்டுக்கு போகிறாய். இதற்கு முந்தைய ஷாட்டில் அடிக்கமுடியாமல் இருந்தாய். இப்போது எங்கு ஆட்டமிழந்திருக்கிறாய் பார்த்தாயா? இது உனது விக்கெட்டை தூக்கி எறிவதற்கு சமம். இந்தியாவின் சூழ்நிலைக்கு இது தேவையில்லை. சூழ்நிலையை புரிந்து ஆட வேண்டும்.

இதுதான் உனது இயல்பான ஆட்டம் எனக் கூறக்கூடாது. என்னை மன்னிக்கவும் இது உங்களது இயல்பான ஆட்டம் கிடையாது. அது ஒரு முட்டாள்தனமான ஷாட். இது உங்களது அணியை இன்னும் மோசமான நிலைக்கு கொண்டுசெல்லும். அவர் இந்திய அணியின் ஓய்வறைக்கு செல்லக்கூடாது. வேறு ஓய்வறைக்கு செல்லட்டும். இவ்வாறு அவர் கூறினார்.

__________________________________________________________________________________________________

மெல்போர்னில் நெகிழ்ச்சி சம்பவம்

ஆஸ்திரேலியாவுக்கு எதிரான 4-வது டெஸ்ட் போட்டியின 3-வது நாள் ஆட்டம் நேற்று நடைபெற்றது. தொடர்ந்து பேட்டிங் செய்த இந்திய அணி ஜடேஜா மற்றும் பண்ட்டின் விக்கெட்டை விரைவில் பறிகொடுத்து திண்டாடியது. இந்த இக்கட்டான சூழலில் கை கோர்த்த வாஷிங்டன் சுந்தர் - நிதிஷ் ரெட்டி இணை சிறப்பாக விளையாடி அணியை வலுவான நிலைக்கு கொண்டு சென்றனர். வாஷிங்டன் சுந்தர் அரைசதம் அடித்த நிலையில் ஆட்டமிழந்தார். அபாரமாக விளையாடிய நிதிஷ் ரெட்டி சதம் அடித்து அசத்தினார். 3-வது நாள் முடிவில் இந்தியா 9 விக்கெட்டுகளை இழந்து 358 ரன்கள் அடித்துள்ளது. நிதிஷ் ரெட்டி 105 ரன்களுடனும், சிராஜ் 2 ரன்களுடனும் களத்தில் உள்ளனர்.

முன்னதாக இந்த ஆட்டத்தில் நிதிஷ் ரெட்டி 99 ரன்களில் இருந்தபோது அவர், சதம் அடிக்க வேண்டும் என்று மைதானத்தில் இருந்த அவரது தந்தை கண்களை மூடி பிரார்த்தனை செய்தார். நிதிஷ் பவுண்டரி அடித்து சதத்தை அடித்ததும் உற்சாகத்தில் பொங்கிய அவர் ஆனந்த கண்ணீர் விட்டார். இந்த வீடியோ இணையத்தில் வைரலாகி வருகிறது.மகனுக்காக பிரார்த்தனை செய்த நிதிஷ் ரெட்டி தந்தையின் செயல் பலரது மத்தியில் நெகிழ்ச்சியை ஏற்படுத்தியுள்ளது. மேலும் அங்கிருந்த ரசிகர்கள் அவருக்கு வாழ்த்துகளை தெரிவித்தனர்.